«Ауыл аманаты» жобасы аясында Әйтеке би ауданының тұрғындарына 535 бас мал берілді

Бүгін Әйтеке би ауданына жұмыс сапарымен барған Ақтөбе облысының әкімі Ералы Тоғжанов әйтекебилік бес отбасына «Ауыл аманаты» жобасы аясында мал алуға сертификаттар табысталды.

«Жаннұр» ШҚ басшысы Сағындық Кішкенебаев ағайынды Мыңбаевтарға 500 бас ұсақ мал, «Еділбай» ШҚ 20 бас ұсақ мал, «Қонысбай» ШҚ, «Берік-АБ» үш отбасына 5 жылқы табыстады.

Өңір басшысы жобаны іске асыруды күшейтуді тапсырды.

 «Ауыл аманаты» - тұрғындардың әл-ауқатын арттыруға тамаша мүмкіндік. Жобаны іске асыру барысында ауыл тұрғындары оның тиімділігін көруі керек. Ірі шаруа қожалықтары «Ауыл аманатынының» іске асырылуына тауарлық несиелер бөле отырып, жәрдемдесіп отырғаны қуантарлық жағдай. Жобаны қолдайтындардың барлығына алғыс білдіремін. Сіздердің бүгін қолдау көрсеткен азаматтар бірнеше жылдан кейін басқаларға көмек көрсете алады. Яғни, жоба ауыл тұрғындарының табысын арттырып қана қоймай, тұрғындарды біріктіруге мүмкіндік береді», - деп атап өтті облыс әкімі.

 «Мен мал шаруашылығын дамытуға несие алу үшін бармаған жерім қалмады, барлық жерде кепіл талап етіледі. Тауарлық несиелеу - өз ісін бастағысы келетіндерге нақты көмек», - деп есептейді Азамат Мыңбаев.

Жалпы, «Ауыл аманаты» жобасы аясында Әйтеке би ауданының тұрғындары «Ақтөбе» ӘКК» АҚ-ға 250,7 млн. теңге сомасына 70 өтінім жолдады, оның 52-сі мақұлдау рәсімінен өтті. 17 отбасы өз жобаларын жүзеге асыруға кірісті.

Тауарлы несиелеу аясында ауданның 25 шаруа қожалығы бұған дейін 25 отбасына 360-қа жуық ірі қара мен ұсақ мал, жылқы берген еді.

Жалпы, тауарлық несиелеу шеңберінде 350-ден астам ақтөбелік отбасы 4000-нан астам ұсақ және ірі қара мал басын алды.

• 21.07.2023
• 155