ҚҰРМЕТТІ ЖЕРЛЕСТЕР!!!

Бүгін Зайсан ауданына жасаған жұмыс сапарым барысында халықпен кездесіп, азаматтарды жеке мәселелері бойынша қабылдадым. Аудан тұрғындары өздерінің өзекті сауалдарын жолдап, бірқатар маңызды мәселелерді алға тартты. Мысалы, Зайсан әуежайынан рейстер санын ұлғайтуға, Алматы мен Астана бағыттарын қосуға тілек білдірді. Сондай-ақ, ауыл тұрғындарын пайдаланылмайтын жайылымдық жерлерді қайтару, ауданды газдандыруды жалғастыру және сапалы интернетпен қамтамасыз ету мәселелері толғандырады. Барлық мәселелер бойынша бейінді басқармаларға тапсырмалар берілетін болады.
Зайсан оқушылары ҰБТ тапсыру үшін облыс орталығына баруы керек деген мәселе өзекті болып қала бермек. Бұл өте үлкен қашықтық, шамамен 500 шақырым және жауапты емтихан алдында, әрине, балаларымыз үшін қолайлы жағдай қажет. Зайсан қала мәртебесіне ие болғандықтан, мектеп оқушыларына ҰБТ-ны ауданда тапсыру мүмкіндігін қарастыру керек.
Сапар барысында күрделі жөндеуді қажет ететін Үйдене су қоймасына бардым. Қазір мұнда тек еріген қар сулар жиналады, ал бұл жерді суару үшін жеткіліксіз. Қазір 2016 жылы жасалған жобалық-сметалық құжаттама түзету үстінде, нәтижесінде республикалық бюджеттен жөндеуге қаражат бөлінетін болады. Үлкен Қаратал ауылындағы мектепті жөндеу барысымен және “Майқапшағай” кеден бекетінің жұмысымен таныстым. Мұнда жол-құрылыс жұмыстарын жүргізіп жатқан мердігерлермен кездестім.

• 21.07.2023
• 307