Нұрлан Ноғаев: «Сергек»-тің басты міндеті - айыппұл салу емес, жолдағы қауіпсіздікті қамтамасыз ету

Ақтау қаласы мен Мұнайлы ауданында 18 шілдеден бастап «Сергек» интеллектуалды бейнебақылау жүйесі іске қосылды. Камералар жұмыс істеп бастаған алғашқы үш күнде жүргізушілер 700-ден астам жол ережесін бұзған. «Сергек» жүйесінің жұмысын таныстыру кезінде Нұрлан Ноғаевқа Маңғыстау жолдарындағы басты мәселе, жол көлік оқиғаларының басқа өңірлермен салыстырғанда жоғары деңгейде екені және оның саны жылдан-жылға артып бара жатқаны баяндалды, деп хабарлайды Маңғыстау облысы әкімінің баспасөз қызметі. 

Ақтау қаласы мен Мұнайлы ауданының жолдарында және қоғамдық орындарында 1138 камера орнатылған, оның ішінде 736 камера жолдардағы тәртіпті қадағаласа, ал 402 камера қоғамдық орындарды бақылайтын болады.

Тәртіп сақшылары «Сергек» жүйесін енгізу жөніндегі жобаны іске асыру Маңғыстаудағы ЖКО санын 30%-ға, ал жолдардағы өлім - жітім мен қоғамдық орындардағы бұзушылықтар санын 40 пайызға төмендетуі тиіс екенін атап өтті.

- Қазақстан жолдарында күн сайын 10-нан аса адам жан тапсырады. Көптеген жүргізушілер жол ережелерін елемейді. Ең көп таралған бұзушылықтар-бағдаршамның тыйым салу сигналына өту, жылдамдықты арттыру және қарсы жолаққа шығу. Біз «Сергек» жүйесін орнатудың арқасында жүргізушілердің жол ережелеріне бағыну тәртібін жақсартатынымызға сенеміз. Тіпті қазірдің өзінде нәтиже байқалады. Қала тұрғындары мен қонақтарының айтуынша, «Сергек» орнатылғалы бері жүргізушілердің көпшілігі автомобиль жылдамдықтарын бәсеңдеткен, - деді ПД ақпараттандыру және байланыс басқармасының бастығы полиция майоры Әлімбет Смайлов.

2023 жылғы 18-21 шілде аралығында Маңғыстау облысында автоматты режимде жұмыс істейтін «Сергек» арнайы техникалық құралының көмегімен 711 әкімшілік құқық бұзушылық анықталған, ал әкімшілік іс-жүргізудің бірыңғай тізіліміне 398 әкімшілік қаулы енгізілген. 
Барлық бұзушылықтар жөнелту алдында автоматты түрде өңделіп, қызметкердің ЭЦҚ-сы арқылы қол қойылады. Бұдан әрі бұзушылықтар туралы хаттар көлік иелеріне екі түрлі жолмен келеді. Біріншісі, SMS -пен болса, екішісі пошта арқылы.
Автокөлік жүргізушісі айыппұл туралы хабарлама алғаннан кейін, жеті күн ішінде соманың жартысын төлеуге мүмкіндігі бар. Ал хабарлама алған сәттен бастап 30 күн ішінде төленбеген айыппұл, мәжбүрлеп өндіруге жіберіледі. 

- Статистика бойынша жол-көлік оқиғаларына басты себеп жүргізушілер мен жаяу жүргіншілердің немқұрайлылығы және тәртіпке бағынбауы. ІІМ-нің соңғы деректері бойынша Маңғыстау ЖКО саны жоғары өңірлердің алдыңғы қатарына кіреді. «Сергек» бақылау жүйесі жүргізушілердің тәртіпке бағынауына ықпал ететініне сенімдімін. Сонымен қатар, бұл жүйес тек жол қозғалысын ғана емес, қоғамдық орындардағы тәртіпті бақылау үшін де көмектеседі, машиналар мен іздеудегі адамдарды анықтауға септігін тигізеді. Бейнебақылау жүйесінің ең басты міндеті-айыппұлдар арқылы ақша табу емес, қоғамдық қауіпсіздікті қамтамасыз ету, жол қозғалысы ережелерін сақтау, - деді облыс әкімі Нұрлан Ноғаев.

• 24.07.2023
• 198