Ақтөбеде электрмен дәнекерленген құбыр шығаратын зауыт салу мүмкіндігі талқыланды

Ақтөбе облысының әкімі Ералы Тоғжанов «Орал металл өңдеу компаниясы» ЖШҚ басшылығымен кездесу өткізді.
Кездесу барысында Ақтөбеде электрмен дәнекерленген құбыр шығаратын зауыт ашу перспективалары талқыланды.
 

 «Біз өңірде жасалған инвестициялық шарттармен танысып, өндіріс үшін қолайлы аумақтары бар индустриялық аймақты аралап шықтық. Ақтөбеде жобаны іске асыруға мүдделіміз, сіздің қолдауыңызды сұраймыз», - деді облыс әкіміне кәсіпорынның бас директоры Дмитрий Нефедов.
 
Ол жобаны екі кезеңде жүзеге асыру жоспарланып отырғанын жеткізді. Бірінші кезеңде инвестиция көлемі 3,5 млн долларға бағаланады. Сондай-ақ, өндіріс экспортқа бағдарланатын болады.
 
Өңір басшысы Ералы Тоғжанов мемлекеттік органдар тарапынан қажетті қолдау көрсетілетініне сендірді.
 

 «Біздің облыста бірқатар ірі инвестициялық жобаларды іске асыру жоспарлануда. Бұл бағытта үлкен жұмыс басталды. Сізге де жан - жақты көмек көрсетіледі», - деді облыс әкімі.
 
«Орал металл өңдеу компаниясы» 2006 жылы құрылған. Кәсіпорын ТМД, жақын және алыс шет елдер үшін металл бұйымдарын өндіруге маманданған.

• 26.07.2023
• 204