Маңғыстау облысында биыл «Ауыл – ел бесігі» бағдарламасы бойынша 78 жоба жүзеге асырылуда

Бүгін аппараттық кеңесте әлеуметтік және инженерлік инфрақұрылымдарды жаңғырту арқылы ауылда өмір сүру сапасын жақсартуды көздейтін «Ауыл – ел бесігі» жобасының іске асырылу барысы талқыланды, деп хабарлайды Маңғыстау облысы әкімінің баспасөз қызметі.

Маңғыстау облысы әкімдігінің экономика және бюджеттік жоспарлау басқармасының басшысы Марина Альбекованың айтуынша, 2019-2022 жылдар аралығында 29 ауылда 118 әлеуметтік маңызды жоба іске асырылған. Осы мақсаттарға республикалық және жергілікті бюджеттен 19,9 млрд теңге бөлінген. 

Бүгінде жалпы сомасы 14,4 млрд теңгеге 102 жоба жүзеге асырылып, сәтті аяқталған. Бұл жобалар инженерлік және көлік инфрақұрылымы, білім беру, денсаулық сақтау, мәдениет және спорт салаларымен байланысты. 

2023 жылы жоба шеңберінде 9,9 млрд теңгеге 78 жобаны іске асыру жоспарланған: 68 жоба – көлік инфрақұрылымын жаңғыртуға, 10 жоба - әлеуметтік инфрақұрылымға қатысты. 

Жиында Нұрлан Ноғаев жұмысты жеделдету және бөлінген ақшаны тиімді пайдалану бойынша тапсырма берді.

- Кейбір жобаларды іске асыру кешіктіріліп, техникалық проблемалар туындайтынын көріп отырмыз. Бірақ соған қарамастан, республикалық бюджеттен қаржыландырылатын жобаларға бөлінетін ақша ағымдағы жылы игерілуі керек екенін есте ұстаған жөн. Ақтау қаласынан басқа аудандарда, бюджет қаражатын игере алмау байқалады. Мұнда басты мәселе -  мердігерлердің өз міндеттемелерін орындамауы. Осының салдарынан жұмыстың аяқталу мерзімін кейінге шегеруге тура келеді. Осындай немқұрайлыққа байланысты, жаңа жұмыс орнын, ауылдарында емхана мен мектептің ашылуын күтіп жүргендер зардап шегеді, - деді Нұрлан Ноғаев.

• 26.07.2023
• 139