Ақмола облысының әкімі азаматтардың жеке қабылдауын өткізді

Облыс әкімі Ермек Маржықпаев азаматтарды жеке мәселелері бойынша қабылдап, өтініштерді жеке, сондай-ақ бейнеконференц байланыс арқылы қабылдады.

Облыс орталығының тұрғыны Наталья Ващенко Сағадиев көшесіндегі ағынды суларды абаттандыру мәселесі бойынша өтініш білдірді.

Қала әкімі Бауыржан Ғайсаның айтуынша жобалау-сметалық құжаттама әзірленіп сараптамаға берілді. Барлық құжаттар алынғаннан кейін, тиісті жұмыстар жүргізілетін болады.

Балуан Шолақтың 160 жылдығына арналған ұйымдастырушылық іс-шараларды талқылау бойынша оның немересі Шайдулла Шолохов өтініш білдірді.

Өтінішті тыңдап, Ермек Маржықпаев Бұланды ауданының әкімдігіне мәдениет басқармасымен бірлесіп, комиссия құруды және айтылған мәселелерді егжей-тегжейлі қарауды тапсырды.

Одан кейін, самбо спорт секциясын дамыту мәселесі бойынша Степногорск қаласының тұрғыны Виталий Маканов өтініш білдірді.

Өңір басшысы дене шынықтыру және спорт басқармасының басшысы Әсет Бөкебаевқа осы мәселені бақылауға алып, көмек көрсетуді тапсырды.

Облыс басшысы қабылдауға келген ақмолалықтардың әрбір сұрағына жауап берді. Әлеуметтік, өндірістік, жер проблемаларынан басқа да өзекті мәселелер қозғалды. Мысалы, Көкшетау қаласының тұрғындары МИБ мүлкін заңсыз басып алу туралы мәселе көтерді.

Соңында Ермек Маржықпаев қатысып отырған мемлекеттік органдарға халықтың проблемаларын уақытында қарау және шешу мүмкіндігін тағы да еске салды.

• 01.08.2023
• 153