Жаңаөзен ет комбинатының өнімі «Қазақстанның үздік тауары» республикалық көрме-конкурсына қатысады

Жаңаөзенге жұмыс сапары барысында Нұрлан Ноғаев өңірдегі бірегей ет өңдеу кәсіпорыны «Халал» сертификаты бар Korkem Alem ет комбинатына барды. Комбинат облыс тұрғындарын сапалы өнімдермен қамтамасыз ете отырып, айына 360 тонна ет пен 100 тонна ет өнімдерін өндіруге қабілетті, деп хабарлайды Маңғыстау облысы әкімінің баспасөз қызметі. 

Комбинат ет өнімдерінің барлық түрін және жартылай фабрикаттардың 50-ден астам түрін өндіреді. Олар қарынбүрме, үлпершек, шұжық, бұқа, қазы сияқты ұлттық тағамдар. 

Korkem Alem компаниясы «Қазақстанның үздік тауары» өңірлік көрме-конкурсында жеңіске жетіп, Астанадағы республикалық конкурсқа қатысу құқығына ие болған еді. Қазіргі таңда компанияда 140 жұмыс орны бар, алдағы уақытта Жаңаөзенде екінші дүкен ашуды жоспарлап отыр. 

Өндірістен басқа, Korkem Alem асыл тұқымды мал шаруашылығын дамытуды субсидиялау жөніндегі арнайы тізілімде тіркелген.

Енді өңірдегі шаруа қожалықтары ірі қара мен ұсақ малды Korkem Alem ет комбинатына беріп, мал басы мен салмағына байланысты мемлекеттен субсидия ала алады. Субсидия мал бордақылау алаңдарына өткізілген ірі және ұсақ малдың асыл тұқымды түрінің құнын арзандату бағыты бойынша беріледі. 

- Әрбір жаңа ашылған кәсіпорын көптеген адамдарды жұмыспен қамтып қана қоймай, оларға кәсіби тұрғыдан дамуға мүмкіндік береді. Сонымен қатар, кәсіпорындардың дамуы жалпы экономиканың өсуіне ықпал етеді. Өңірімізде неғұрлым кәсіпорын көп болған сайын, тартылатын инвестициялар артады. Өндіріс пен тұтыну көлемі ұлғаяды. Бұл басқа салалардың өсуіне қолайлы жағдай жасайды, шағын және орта бизнестің дамуын ынталандырады, аймақтық және ұлттық деңгейде жұмыссыздық деңгейінің төмендеуіне ықпал етеді. Алайда, кәсіпорындарды дамыту-бұл мемлекеттің, инвесторлардың және жалпы қоғамның қолдауын қажет ететін күрделі процесс. 2023 жылы Маңғыстау облысында кәсіпкерлікті дамыту жөніндегі ұлттық жоба аясында республикалық бюджеттен 13 миллиард теңге, ал жергілікті бюджеттен 1,2 миллиард теңге бөлінді. Қаражат пайыздық мөлшерлемелерді субсидиялауға, кредиттерге кепілдік беруге және жаңа бизнес-идеяларға мемлекеттік гранттар беруге бағытталған, - деп атап өтті Нұрлан Ноғаев.

• 03.08.2023
• 141