Нұрлан Ноғаев: сыбайлас жемқорлықтың алдын алу және қоғаммен кері байланысты жақсарту - біздің басты басымдығымыз

Ақтауда өңір басшысы Нұрлан Ноғаевтың қатысуымен Сыбайлас жемқорлыққа қарсы іс-қимыл жөніндегі комиссияның отырысы өтті, деп хабарлайды Маңғыстау облысы әкімінің баспасөз қызметі. 

Жиынға жұртшылық өкілдері, депутаттар, үкіметтік емес ұйымдардың мүшелері, құқық қорғау және мемлекеттік органдардың басшылары қатысты. 

Басқосуда "Сыбайлас жемқорлықтың алдын алу және оған қарсы іс-қимыл" үлгілік базалық бағытының жобаларын іске асыру барысы және Мемлекеттік кірістер департаментінің сыбайлас жемқорлыққа қарсы іс-шаралар жай-күйін қоса алғанда, маңызды мәселелер талқыланды. Сондай-ақ, ҚР Сыбайлас жемқорлыққа қарсы саясатының 2022-2026 жылдарға арналған тұжырымдамасын іске асыру шеңберінде әртүрлі нысаналы топтар деңгейінде декомпозицияланған ақпараттық жұмыс жүргізу жөніндегі іс-шаралар жоспарының орындалуы пысықталды.

Сыбайлас жемқорлыққа қарсы іс-қимыл агенттігінің Маңғыстау облысы бойынша департаменті басшысының бірінші орынбасары Біржан Хайруллин өз сөзінде өңір бойынша Мемлекеттік кірістер департаментінің сыбайлас жемқорлыққа қарсы іс-қимыл шаралары туралы ақпарат берді. 

"Бизнеске жол" жобасы бойынша кәсіпкерлердің басым көпшілігі мемлекеттік кірістер органдарының камералдық бақылау қорытындылары бойынша анықталған бұзушылықтарды жою туралы хабарламаларына қатысты шағымдармен жүгінген. 

Осы орайда Сыбайлас жемқорлық тәуекелдерін жою мақсатында Мемлекеттік кірістер департаментінің қызметінде келесідей шаралар ұсынылады: 

▪️ішкі талдау қорытындылары бойынша енгізілген ұсынымдардың орындалуын қамтамасыз ету;
▪️камералдық бақылау қорытындылары бойынша анықталған бұзушылықтарды жою туралы хабарламаларға кәсіпкер ұсынатын түсініктемелерді жан-жақты қарауды қамтамасыз ету;
▪️көрсетілетін қызметті алушы мен кеден бекеттеріндегі қызметкерлер арасындағы тікелей байланыста сыбайлас жемқорлық тәуекелдерін азайту мақсатында портативті бейнетіркегіштердің үздіксіз қосылуын қамтамасыз ету;
▪️ашықтықты қамтамасыз ету және Кәсіпкерлерге қызмет көрсету орталықтарындағы әкімшілік кедергілерді жою мақсатында QR-коды бар жадынамаларды орналастыру. 

Нұрлан Ноғаев сыбайлас жемқорлық пен заңсыз әрекеттердің алдын алудың маңыздылығын атап өтті. Ол сыбайлас жемқорлық тәуекелдерін уақтылы тоқтату қағидатын қолдады. Сондай-ақ, қазір қоғамның маңызды мемлекеттік шешімдерге ықпалы тиісті деңгейде екенін атап өтті. Өңір басшысы әрбір мемлекеттік органды халықпен кері байланыс тетіктерін жетілдіруге және жұртшылық өкілдерімен белсенді өзара іс-қимыл жасауға шақырды.

• 08.08.2023
• 122