Газды пайдалану кезіндегі заң бұзушылықтар: Маңғыстауда өрттің алдын алу шаралары талқыланды

Маңғыстау облысы әкімінің төрағалығымен өткен төтенше жағдайлардың алдын алу және жою жөніндегі комиссияның отырысында электр жабдықтарын монтаждау және техникалық пайдалану ережелерін бұзудан туындаған өрттердің негізгі себептері айтылды, деп хабарлайды Маңғыстау облысы әкімінің баспасөз қызметі. 

ТЖД басшысы Мұрат Мұханов өрттің жиі кездесетін себептері, отпен жұмыс істеу кезіндегі абайсыздық және газ плиталарын орнату мен пайдалану кезіндегі қателіктер екенін атап өтті. Облыс аумағын газдандыру жеке тұрғын үйлерді қоса алғанда, табиғи газды пайдаланумен байланысты қолайсыз жағдайларға алып келген. 2023 жылғы 17 сәуірде болған Жаңаөзен қаласындағы көппәтерлі тұрғын үйдің жарылуы, соның мысалы. Газбен жабдықтау жүйелерін пайдалану талаптарын бұзу нәтижесінде газ-ауа қоспасынан алты адам қаза тауып, 11 адам зардап шеккен.

«ҚазТрансГаз» деректері бойынша бүгінгі таңда облыс бойынша жеке сектор мен көппәтерлі тұрғын үйлер арасында барлығы 178 677 газ тұтынушысы бар, соңғы 5 жылда олардың саны 17%-ға артқан. 
Сонымен қатар, "104" диспетчерлік қызметіне апаттық өтінімдер саны да айтарлықтай өсті. Ағымдағы жылы 3 мыңнан астам өтінім тіркелді, бұл соңғы 5 жылда апаттық өтінімдердің 25% өскенін көрсетеді. 

Комиссия отырысында өртке қарсы су көздері гидранттарының жай-күйі де талқыланды. Қазіргі уақытта облыста 5542 өрт гидранты тіркелген. Оның 4696-сы жарамды, ал 835-і жарамсыз деп танылды. Облыс әкімі жарамсыз гидранттарды қалпына келтіру жұмыстарын жүргізуді тапсырды.

Сонымен қатар, өңір басшысы өрт қауіпсіздігі ережелерінің сақталуын бақылауды күшейтуге және тұрғындарды сақтық шараларын сақтауға шақырды. Сондай-ақ, халықтың әлеуметтік аз қамтылған санаттары тұратын жеке үйлерде профилактикалық рейдтер мен датчиктерді орнату жұмыстары жалғасын табатын болады. 

- Мониторинг нәтижелері бойынша жазатайым оқиғалардың салдарынан халықтың осал топтары, сондай-ақ жалғызбасты зейнеткерлер жиі зардап шегетіні анықталды. 2019 жылдан бастап тұрғын үйлерде бюджет есебінен дабыл датчиктері мен газ анализаторлары орнатылады. Осы мақсатқа 2019 жылдан бері арнайы қаржы бөлініп келеді. Қауіпсіздік талаптарын күшейту жөніндегі жұмыстар 2023-2024 жылдардағы жылыту маусымында да жалғасын табатын болады. Осы тұста аудан әкімдері мен ТЖД өкілдеріне бұл жұмысты жандандыруды тапсырамын. Сондай - ақ өрт қауіпсіздігі ережелерінің сақталуын және заң бұзушылықтарды уақтылы жоюды бақылауды күшейту қажет, - деді Нұрлан Ноғаев.

• 08.08.2023
• 177