2023 жылдың 7 айындағы мемлекеттік қаржының атқарылуы туралы

Бүгін Үкімет отырысында Қазақстан Республикасы Премьер-Министрінің орынбасары – Қаржы министрі Ерұлан Жамаубаев ағымдағы жылдың 7 айының қорытындысы бойынша мемлекеттік қаржының атқарылуы туралы баяндады.

Е. К. Жамаубаев өз сөзінде мемлекеттік бюджетке 10,4 трлн. теңгеден аса кірістер түсіп, жоспар 98,2%-ке орындалғандығын атап өтті.

Республикалық бюджетке 6,8 трлн. теңге кіріс түсті.

Жергілікті бюджеттердің кірістері 118%-ке атқарылды және 3,5 трлн. теңгені құрады. Жоспар 542 млрд. теңгеге, оның ішінде салықтар бойынша 497 млрд. теңгеге асыра орындалды.

 Мемлекеттік бюджеттің шығыстары 98,8%-ке, республикалық бюджеттің шығыстары  99,3%-ке, жергілікті бюджеттердің шығыстары 98,8%-ке орындалды.

Сондай-ақ, 2023 жылдың 7 айында 1 300 аудиторлық іс-шара өткізілгені атап өтілді. Аудитпен 771 млрд. теңге бюджет қаражаты қамтылды. Тексеру қорытындысы бойынша шамамен 137 млрд. теңге сомасында қаржылық бұзушылықтар анықталды, оның ішінде мемлекеттік аудит объектілері тауарларды жеткізуді қалпына келтіру, қызметтер көрсету және жұмыстарды орындау, бюджетке өтеу және есепке алу бойынша көрсету жолымен 104 млрд. теңгеге бұзушылықтарды жойды.

Өз сөзінің соңында Ерұлан Жамаубаев жекешелендірудің 2021 - 2025 жылдарға арналған Кешенді жоспарын іске асыру туралы айтты.

• 15.08.2023
• 167