Оңдасын Оразалин ЕҚЫҰ-ның байқаушыларымен кездесті

Бүгін Ақтөбе облысының әкімі Еуропадағы Қауіпсіздік және Ынтымақтастық Ұйымының халықаралық байқаушылары Александра Пайевич, Валентин Воронковпен кездесті.

Халықаралық байқаушылардың өңірге келудегі мақсаты, ҚР Парламенті Мәжілісі мен мәслихаттары депутаттарын таңдауда облыс көлеміндегі сайлаудың әділ өтуін, барлық кандидаттарға жасалған жағдайдың тең болуын бақылау. Оңдасын Оразалин кездесу барысында сайлаудың тиянақты, сапалы ұйымдастырылуын қамтамасыз ету мақсатында дайындықтардың қызу жүргізіліп жатқандығын жеткізді.

“Ақтөбе өңіріне қош келдіңіздер, біздің тарапымыздан сайлаудың әділ өтуі, ашықтық бірінші орынға қойылады. Алдағы сайлау өз конституциялық мерзімінде өткізіледі. Бұл сайлаудың ерекшелігі – партиялық тізімге дауыс беріледі. Сондықтан біздің міндетіміз – сайлауға қатысушы барлық партияларға бірдей жағдай жасау. Ол үшін біз материалдық-ұйымдастырушылық шараларды жан-жақты қолға алдық. Сонымен қатар, облыстағы азаматтық қоғам өкілдері дауыс беру барысында бақылаушы болуға ниет білдіргенін атап өткім келеді. Облыс орталығында партиялық емес бақылау орталығының облыстық штабы құрылды, ол азаматтық қоғам бақылаушыларының жұмысын жүйелеп, үйлестіретін болады ”,-деп атап өтті облыс әкімі. Александра Пайевич, Валентин Воронков өз кезегінде облыс әкімінің жылы қабылдауы мен алдағы жауапты шараға өңірдің жоғары дайындығы үшін алғыс білдірді.

• 24.12.2020
• 284