ҰЭМ басшысы Петропавлдағы ЖЭО-2-ге барды

Солтүстік Қазақстан облысына жұмыс сапары барысында Ұлттық экономика министрі Әлібек Қуантыров Петропавлдағы Караванная көшесі бойындағы апаттық жағдайдағы теміржол өтпесінің жай-күйімен танысты. 1960 жылдары салынған бұл өтпеге қала тұрғындары үнемі шағым айтады. Құрылыс шамамен 10 жыл бұрын күрделі жөндеуден өткен.

Көлік ағынын төмендету үшін Жұмысшылар кентінде теміржол арқылы өтетін жаңа автомобиль көпірін салу жоспарлануда. Жобаның құны 5,9 млрд. теңге. Жалпы ұзындығы - 427 метр. Биылғы жылы "Қуатты өңірлер - ел дамуының драйвері" ұлттық жобасы шеңберінде жұмысты бастау жоспарлануда. Республикалық бюджеттен 5,4 млрд. теңгеден астам қаражат бөлу қажет. Бюджеттік өтінім ҰЭМ-ге жіберілді.

Бұдан әрі министр "СЕВКАЗЭНЕРГО"АҚ Петропавл ЖЭО-2-де болды. Бүгінгі таңда кәсіпорында 12 қазандық және 7 турбоагрегат бар. Тозу - 53,5%.

2023 жылға арналған бекітілген тарифтер шеңберінде жергілікті атқарушы органдармен бірлесіп Кәсіпорынның инвестициялық бағдарламасы мынадай бөлімдер бойынша түзетілді:

- 424 млн. теңгеге қазандық агрегатын қайта салу;

- 740 млн. теңгеге қазандық агрегатын күрделі жөндеу;

- ЖЭО-2 турбоагрегатын 617 млн. теңгеге қайта жаңарту;

- қазандықты 156 млн. теңгеге ауыстыру.

Кәсіпорынның өндірістік қызметкерлерінің жалақысы шамамен 40% - ға өсті. Қазір мұнда 676 адам еңбек етуде.

Ә.Қуантыровтың айтуынша, министрлік "Тарифті инвестицияға айырбастау" бағдарламасын жүзеге асыруда. Бүкіл ел бойынша 62 мың шақырым инженерлік желіні жаңғыртуға шамамен 3 трлн.теңге инвестиция тарту болжануда. ҰЭМ-нің мәліметтері бойынша, бұл желілердің тозуын 2029 жылға қарай 20%-ға төмендетуге мүмкіндік береді.

"Жүргізіліп жатқан барлық шаралар апаттар мен желіден ажыратулардың санын төмендетуге, шығындарды азайтуға мүмкіндік береді. Бұл өз кезегінде көрсетілетін қызметтердің сапасы мен сенімділігін жақсартады", - деді министр.

Сондай-ақ, ҰЭМ басшысы "РимКазАгро"ЖШС қағаз өнімдерін шығаратын фабриканың жұмысымен танысты.

Қағаз өнімдерінің өндірісі жылына 5 мың тоннаны құрайды. Салынған инвестиция көлемі - 2,5 млрд. теңге. Жобаға "Қарапайым заттар экономикасы" бағдарламасы шеңберінде субсидия берілді.

Фабрика "Радуга" көпсалалы компаниясының құрамына кіреді. Жалпы ауданы 37 га болатын индустриалдық кешенде бұған дейін халық тұтынатын тауарлар мен азық-түлік өнімдерін шығаратын бірнеше кәсіпорын іске қосылған болатын. Қазіргі уақытта өңір халқын көкөніс өнімдерімен жыл бойы қамтамасыз ету мақсатында жылыжай кешенінің белсенді құрылысы жүріп жатыр. Жобаға инвестициялар 7,2 млрд. теңгені құраса, оның ішінде 1,4 млрд.теңгесі меншікті қаражат.

• 16.08.2023
• 143