Ақмола облысында Спорт күні атап өтілді

Көкшетау қаласында спортшыларға, жаттықтырушыларға, спорт ардагерлеріне және спорт ұйымдарының қызметкерлеріне құрмет көрсету салтанатты рәсімі өтті.

Ақмола облысының әкімі Ермек Маржықпаев пен ҚР Ұлттық Олимпиада комитеті спорт департаментінің директоры Ерсияр Қанағатов спорт саласының өкілдерін кәсіби мерекелерімен құттықтады.

Өңір басшысы биылғы жылдың басынан бері республикалық және халықаралық жарыстарда облыс спортшылары түрлі номинациялардағы 2361 медаль жеңіп алғанын атап өтті. Әр түрлі спорт  түрлері бойынша ұлттық құрама командалардың құрамында 357 Ақмола тәрбиеленушісі бар.

"Біздің өңірде Мемлекет басшысы алдымызға қойған міндеттерді орындау үшін барлық қажетті жағдайлар жасалуда. Спорттық инфрақұрылымның кеңеюіне байланысты салауатты өмір салтын насихаттайтын адамдар саны жыл сайын артып келеді. Бүгінде облысымыздың әрбір үшінші тұрғыны дене шынықтырумен және спортпен шұғылданады.

Біздің спортшыларымыздың кәсіби спорт саласындағы жетістіктерін ерекше атап өткім келеді, олардың жетістіктерінің арқасында Қазақстанның туы әлемдік аренада бірнеше рет көтерілді", - деп атап өтті Ермек Маржықпаев.

Облыста спорт инфрақұрылымын салу бойынша жоспарлы жұмыстар жүргізілуде. Жыл сайын жаңа заманауи алаңдар, дене шынықтыру - сауықтыру кешендері, спорт сарайлары, стадиондар салынып жатыр, адамдардың денсаулығын нығайтуға көп көңіл бөлінеді.

Бұл күні алғыс пен ризашылық дене шынықтыру мен спорт өмірінің мәніне айналған, олардың рекордтары мен жетістіктері облыс шежіресі беттерінде лайықты орын алған ақмолалықтарға арналды.

Іс-шара осы саланың үздік өкілдерін марапаттау рәсімімен жалғасты. Еңбек қызметінде қол жеткізген жоғары нәтижелері үшін бірқатар спортшыларға "Еңбек ардагері", "Құрметті спорт қызметкері" және "Дене шынықтыру және спорт дамуына қосқан үлесі үшін" төсбелгілерін, "ҚР ҰОК-на 30 жыл" мерейтойлық медальдарын, ҚР Мәдениет және спорт министрі мен Ақмола облысы әкімінің алғыс хаттарын, сондай-ақ көлікті сатып алуға сертификаттар табысталды.

• 22.08.2023
• 107