Балалардың қауіпсіздігі және білім берудің қолжетімділігі мәселелері - Тамыз конференциясында талқыланды

Биыл 2 жаңа мектеп салынып, 5 мектеп кеңейтіледі. 115 білім беру нысанында жөндеу жұмыстары жүргізілді. 17 мектеп қазандығы қауіпсіз жерге ауыстырылды. 2025 жылға дейін «Жайлы мектеп» жобасы бойынша 18 білім ордасы салынады.

Сонымен қатар Қарағандыда үшінші Оқушылар шығармашылығы сарайы салынуда. Сондай-ақ, Қарқаралы ауданында жыл бойы жұмыс жасайтын лагерь, ал Ақтоғай және Абай аудандарында шатырлы лагерьлерді құруды жоспарлап отырмыз.

Аймақтағы барлық бастауыш сынып оқушылары ыстық тамақпен қамтамасыз етілді. Сондай-ақ, биылғы жылдан бастап әлеуметтік осал отбасылардан шыққан балабақша тәрбиеленушілерінің тамақтануына кететін шығындарды толығымен өтейтін боламыз.

Аймағымыздағы қиын өмірлік жағдайға тап болған балаларға қамқорлық жасалуда. Бұл үшін облыста психологиялық сүйемелдеу орталығы жұмыс істейді. Орталық мамандары мектеп психологтарының жұмысын үйлестіреді және зорлық-зомбылықтан зардап шеккен балаларға көмек көрсетеді. Сондай-ақ, тұрмыстық зорлық-зомбылық құрбандарына арналған 8 дағдарыс орталығы мен 7 отбасын қолдау орталығы жұмыс жасайды. Бұған қоса, биыл Отбасыларға құқықтық көмек көрсету орталығы ашылады.

Жаңа оқу жылында балаларға қолайлы оқу жағдайларын жасау біздің басты мақсатымыз болып табылады. Бұл орайда әкімдіктердің, педагогтар мен ата-аналардың бірлесіп жұмыс жасауы аса маңызды.

• 26.08.2023
• 226