«2024 - 2026 жылдарға арналған республикалық бюджет туралы» Заң жобасы

Бүгін ҚР Премьер-Министрдің орынбасары - Қаржы министрі Ерұлан Жамаубаев ҚР Үкіметінің отырысында «2024 - 2026 жылдарға арналған республикалық бюджет туралы» Заң жобасын ұсынды.

Өз сөзінде, Е. Жамаубаев 2024 жылға түсімдер 20,4 трлн. теңге деңгейінде болжанатынын атап өтті. 2024 жылы бюджет тапшылығы жалпы ішкі өнімге 2,6% деңгейінде жоспарланып отыр, 2026 жылға қарай жалпы ішкі өнімге 2,3% - ке дейін біртіндеп төмендейді.

Кірістер мен тапшылықты ескере отырып, келесі жылы бюджет шығыстары 2023 жылға қарағанда 1,5 трлн. теңгеге ұлғаюмен жоспарланып, шамамен 24 трлн. теңгені құрайды.

Бюджет шығыстарының негізгі үлесі әлеуметтік салаға тиесілі (бюджеттің жалпы шығыстарының 41%-і). Олардың 90% - ке жуығы азаматтардың жекелеген санаттарына зейнетақы, жәрдемақы, атаулы әлеуметтік көмек, біржолғы ақшалай өтемақы төлеуге тиесілі. Ерұлан Жамаубаев сондай-ақ экономика салаларын қолдау және дамыту шығындарының параметрлеріне тоқталып өтті. Бұл мақсаттарға шамамен 2,8 трлн. теңге қарастырылған.

Атап айтқанда, өңдеу өнеркәсібін, көлік және газ тасымалдау жүйесін дамыту, ауыз сумен және табиғи газбен қамтамасыз ету, бизнесті қолдау және басқа да басым міндеттерді іске асыру жоспарлануда. Сондай-ақ, күш құрылымдарының шығыстарына көлемінде 2,6 трлн. теңге жоспарлануда. Жалпы, мемлекеттің қорғаныс қабілеті мен қауіпсіздігін қамтамасыз ету, құқықтық тәртіпті қорғау және ішкі тұрақтылықты қолдау жөніндегі іс-шаралар толық көлемде іске асырылатын болады. Жақын арада Заң жобасы Парламент Мәжілісінің қарауына енгізілетін болады.

• 29.08.2023
• 158