Білім беру ұйымдарына машиналардың кілттері табысталды

Конституция күні қарсаңында білім беру қызметкерлеріне автокөліктердің кілттері табысталды.

Ақмола облысының әкімі Ермек Маржықпаев Зеренді, Біржан сал, Сандықтау, Астрахан және Жақсы аудандарының психологиялық-педагогикалық түзету кабинеттерінің меңгерушілеріне арнайы автокөліктің кілттерін салтанатты түрде табыс етті.

«Өңірде инклюзивті білім беруді дамытуға көп көңіл бөлінеді. Негізгі міндеттердің бірі - білім алу үшін қолайлы жағдай жасау. Көлік барлық талаптарға сай болады, сондай-ақ ата-аналар мен балаларды жайлылығымен, сапасымен, сенімділігімен және функционалдылығымен қуантады деп үміттенеміз», - деп атап өтті облыс басшысы құттықтау сөзінде.

Айта кетейік, биыл өңірде 29 түзету кабинетін ашу үшін 300 млн теңгеден астам қаржы бөлінді. Көкшетау қаласының №4 арнайы мектеп-интернатының қосымша корпусының құрылысы аяқталуда. Ерекше білім беру қажеттіліктері бар балаларға арналған оңалту орталығы мен екі балабақша салу жұмыстары басталды. Үш жыл ішінде балаларды тасымалдау үшін 11 арнайы машина сатып алынды.

• 29.08.2023
• 155