Ақмола облысының аумағында екі өңірдің бірлескен оқу-жаттығулары өтті

Ақмола облысы Зеренді ауданының шекара маңында және Солтүстік Қазақстан облысы Айыртау ауданы Альжанка ауылының маңында «ОРМАН-2023» табиғи өрттерді сөндіру бойынша өрт-тактикалық оқу-жаттығулары өтті, - деп хабарлайды Ақмола облысының ТЖД баспасөз қызметі.

Оқу-жаттығуға барлығы 49 бірлік техника, 1 тікұшақ және 200-ге жуық адам қатысты, орман және дала алаптарының өрттерін ерте анықтау жүйесі таныстырылды.

Оқу-жаттығу барысында өрт шыққан жерді аэровизуалды тексеруден кейін өрт сөндіру десантын түсіру, «Зерен» жартасынан зардап шеккендерді құтқару бойынша, Альжанка ауылының тұрғындарын эвакуациялау және оларды шатырлы қалашыққа орналастыру, оларға медициналық және психологиялық көмек көрсету іс-қимылдары көрсетілді.

«Көкшетау» МҰТП" РММ бөлімшелерінің, өрт сөндіру және авариялық-құтқару жұмыстары қызметінің, М. Ғабдуллин атындағы азаматтық қорғау академиясының және жергілікті атқарушы органдардың өзара іс-қимылы пысықталды.

Оқу-жаттығулар облыстардың төтенше жағдайлар департаменттерінің, жергілікті атқарушы органдардың, авариялық-құтқару қызметтерінің және әскерилендірілмеген өртке қарсы құралымдардың өзара іс-қимылын пысықтау, табиғи өрттерді жою кезіндегі практикалық іс-қимылдарды пысықтау мақсатында өткізілді.

Оқу-жаттығу қорытындысы бойынша басшылық құраммен жедел әрекет ету, өрттерді уақтылы анықтау, орман және дала өрттерін сөндіру тәсілдері мен тактикасы бойынша іс-шаралар пысықталды.

• 29.08.2023
• 167