Мұнайлы ауданында 2024 жылдың соңына дейін орталық аудандық аурухана пайдалануға беріледі

Өңір басшысы Нұрлан Ноғаевтың қатысуымен өткен аппараттық кеңесте облысты дамытудың 2021-2025 жылдарға арналған денсаулық сақтау және балық шаруашылығы салаларындағы кешенді жоспарды орындауға байланысты негізгі мәселелері қаралды, деп хабарлайды Маңғыстау облысы әкімінің баспасөз қызметі.

Маңғыстау облысының Денсаулық сақтау басқармасының басшысы Аманбек Жұмыров өңірді кешенді дамыту жоспары аясында денсаулық сақтау аясында 2023 жылға 12 маңызды іс-шараны іске асыру жоспарланғанын атап өтті.

Осындай іс-шаралардың бірі Ақтау маңындағы Рауан тұрғын алабында жұмыс істейтін, ауысымда 50 адам қабылдауға арналған медициналық амбулатория құрылысы. 2022 жылы жеке инвестордың қолдауымен құрылысы басталған нысан 2023 жылы пайдалануға берілді.

2023 жылға арналған медициналық амбулаториялар салу жоспарына сәйкес, жеке инвестициялық жобалардың аясында С. Шапағатов ауылында медициналық амбулатория салынып, пайдалануға берілді. Сонымен қатар, Жаңаөзен қаласының Ақбұлақ шағынауданында медициналық амбулатория құрылысын аяқтау үшін жергілікті бюджеттен қаражат бөлінді.
Келешекте Мұнайлы ауданындағы орталық аудандық аурухананың құрылысын аяқтау және оны 2024 жылдың соңында пайдалануға беру көзделіп отыр.

Ақтауда 34 "А" шағынауданында мемлекеттік-жекеменшік әріптестік құралы арқылы жүзеге асырылатын ауысымына 300 келушіге арналған емхана салу бойынша дайындық жұмыстары жүргізілуде. Жобалық құжаттаманы әзірлеуге конкурс өткізу үшін жергілікті бюджеттен қаражат бөлінді.

Бұдан басқа, дамудың кешенді жоспарына сәйкес Бейнеу ауданы Тәжен ауылында және Қарақия ауданы Аппақ ауылында медициналық пункттер салу жобаларын әзірлеу үшін жергілікті бюджеттен қаражат бөлінді.

Нұрлан Ноғаев халыққа медициналық көмектің сапасы мен қолжетімділігін жақсартуға баса назар аудару керек екенін айтты.

- Ауруханалар мен емханалардың құрылысын бақылау - біздің қоғам алдындағы міндетіміз. Ауруханалар мен емханалар салу-бұл жәй ғана ғимарат салу емес, бұл тұрғындардың ауыл не қалада өмір сүретініне қарамастан денсаулығы мен болашағына инвестиция салу деген сөз. Мемлекет Басшысы Қасым-Жомарт Тоқаев Қазақстан халқына соңғы Жолдауында медициналық инфрақұрылымды, оның ішінде мемлекеттік-жекешелік әріптестік арқылы аталған кешенді жақсартуға ерекше назар аударуды айтты. Президент сондай-ақ, денсаулық сақтау саласындағы резидентурада оқуға арналған гранттар санын келесі жылдың басынан бастап үш жыл ішінде 70%-ға арттыруды тапсырды. Бұл шаралардың барлығы ұлт денсаулығын жақсартуға бағытталған, - деді Нұрлан Ноғаев.

Сондай-ақ, аппараттық кеңесте өңірдің әлеуметтік-экономикалық дамуының кешенді жоспары шеңберінде облыстағы балық шаруашылығының жұмысына байланысты маңызды мәселелер талқыланды. Жиында балық шаруашылығының жаңа субъектілерін құру және жұмыс істеп тұрған кәсіпкерліктер санын арттыру, балық шаруашылығын дамыту үшін жер учаскелерін беру, балық өсіруге қажетті инфрақұрылым салу мәселелеріне ерекше назар аударылды.

Қазіргі уақытта өңірде тауарлық балық өсіруге маманданған 3 кәсіпорын табысты жұмыс істеуде. Бұл "Kazakh Osseter" ғылыми-өндірістік кәсіпорны ЖШС, "Caspian Riviera" ЖШС және "Nataly Company" ЖШС.

Бұдан басқа, Форт-Шевченко қаласында "CaspyAltynBalyk" ЖШС тұйық сумен жабдықтау қондырғысын пайдалана отырып, бекіре балықтарын өсіру және кейіннен қайта өңдеу жөніндегі жобаны іске асыру белсенді жүргізілуде. Бұл жобаны 2024 жылы іске қосу жоспарлануда, бұл аймақтағы балық өнеркәсібінің дамуына ықпал етеді.

• 07.09.2023
• 138