"Каспий ӘКК" АҚ Маңғыстау облысының бюджетіне 176 миллион теңге көлемінде дивиденд төледі

Өңір басшысы Нұрлан Ноғаевтың төрағалығымен "Каспий ӘКК" АҚ-ның директорлар кеңесі өтті. Жиналыста "Каспий ӘКК" АҚ-ның 2019-2023 жылдарға арналған даму жоспары және 2022 жылға арналған жұмыстардың орындалуы туралы есеп қаралды, деп хабарлайды Маңғыстау облысы әкімінің баспасөз қызметі.

Айта кетейік, биыл "Каспий ӘКК" АҚ құрылған сәттен бастап алғаш рет облыстық бюджетке 176 миллион теңге көлемінде дивиденд төленді. 

Облыс әкімі Нұрлан Ноғаев ӘКК-ның негізгі мақсаты-инвестициялар тарту, үкіметтік және жергілікті бастамаларды іске асыру арқылы өңір халқының әл-ауқатын арттыру болып табылатынын айтты. Ол сондай-ақ, компанияның дағдарыс кезіндегі активтерді қайта қарауының арқасында дамуда оң динамикаға қол жеткізгенін атап өтті.

- Әлеуметтік кәсіпкерлік корпорация - бұл инвестиция тартумен айналысатын даму институты. 2022 жылы Маңғыстауда 1 444,4 млн. теңгеге инвестициялық жобалар іске асырылды. 2023 жылға - бұл соманы 14,4 млрд. теңгеге дейін ұлғайту міндеті тұр. Бүгін біз корпорацияның алғаш рет оң экономикалық нәтиже көрсеткенін көріп отырмыз. Әлеуметтік-кәсіпкерлік корпорациялар даму институты екенін әрдайым есте ұстаған жөн. Олар бизнеспен бәсекеге түспеуі керек, бірақ өңірдің бәсекеге қабілеттілігін арттыруға ықпал ететін Даму қозғалтқышы болуы тиіс, - деп атап өтті Нұрлан Ноғаев. 

Әлеуметтік-кәсіпкерлік корпорация (ӘКК) - бұл тауарлар мен қызметтерді өндіру және сату арқылы кіріс әкелетін, кәсіпкерлік қызметпен айналысатын ұйымдар. ӘКК-нің коммерциялық корпорациялардан басты айырмашылығы - түскен пайда халықтың әлеуметтік және экономикалық бастамаларын іске асыруға қайта инвестицияланады.

• 12.09.2023
• 151