2023 жылғы 8 айдағы мемлекеттік қаржыны атқару туралы

Бүгін Үкімет отырысында ҚР Премьер-Министрінің орынбасары – Қаржы министрі Ерұлан Жамаубаев ағымдағы жылдың 8 айының қорытындысы бойынша мемлекеттік қаржының атқарылуы туралы баяндады.

Е. Жамаубаев өз сөзінде мемлекеттік бюджетке 12,5 трлн. теңгеден астам кіріс түскенін және жоспар 97,2% - ке орындалғанын атап өтті.

Республикалық бюджетке 8.3 трлн. теңге түсті.

Жергілікті бюджеттердің кірістері 118,5 % - ке орындалып, 4,2 трлн. теңгені құрады. Жоспар 659 млрд. теңгеге, оның ішінде салықтар бойынша - 610 млрд. теңгеге асыра орындалды.

Мемлекеттік бюджет шығыстары 98,6%-ке, республикалық бюджет шығыстары 99,3%-ке, жергілікті бюджеттер шығыстары 98,3%-ке орындалды.

Сондай-ақ, 2023 жылдың 8 айында 1 522 аудиторлық іс-шара өткізілгені атап өтілді. Аудитпен 1 трлн. теңгеден астам бюджет қаражаты қамтылды. Тексеру қорытындысы бойынша шамамен 141 млрд. теңге сомаға қаржылық бұзушылықтар анықталды, оның ішінде мемлекеттік аудит объектілері тауарларды жеткізуді қалпына келтіру, қызметтер көрсету және жұмыстарды орындау, бюджетке өтеу және есепке алу бойынша көрсету жолымен 109 млрд. теңгеге бұзушылықтар жойылды.

Өз сөзінің соңында Ерұлан Жамаубаев жекешелендірудің 2021 - 2025 жылдарға арналған Кешенді жоспарды іске асыру туралы айтты.

• 13.09.2023
• 142