Ақмола облысында көмір тұйықтарында шамамен 70 мың тонна көмір бар

Ақмола облысында жылу беру маусымына дайындық аяқталуда. Бүгін таңда өңірде жылу желілерін жөндеу жұмыстары жүргізілді, қазандықтар мен тіршілікті қамтамасыз ету нысандары дайындалып, жөнделді, деп хабарлайды облыс әкімдігінің баспасөз қызметі.

Облыстық энергетика және тұрғын үй-коммуналдық шаруашылық басқармасының ақпараты бойынша, Мемлекет басшысының тапсырмасы аясында Көкшетау және Степногорск қалаларында жылумен жабдықтау мәселелерін шешу бойынша іс-шаралар жоспары әзірленіп, ҚР Үкіметінің резервінен қаражат бөлінді. Міндеттердің қатарында қазандықтарды, жылу желілерін жөндеу, облыс орталығындағы жылу көздерін қалпына келтіру және ЖЭО-дағы жабдықтарды, сондай-ақ Степногорск қаласындағы магистральдық желілерді жөндеу қарастырылған.

Халықты көмірмен қамтамасыз ету мәселелері ерекше бақылауда. Ақмола облысының күзгі-қысқы кезеңде көмірге қажеттілігі шамамен  1,5 млн тонна құрайды, оның ішінде халық үшін 1 млн тонна, коммуналдық-тұрмыстық қажеттіліктерге 530 мың тонна. Көмір сататын 56 пункт жұмыс істейді. Жеткізу көлемін ұлғайту мақсатында өңірлік операторлар тізбесіне 16 ауданнан 66 өнім беруші енгізілді.

«Облыстың көмір тұйықтарында шамамен 70 мың тонна көмір бар. Облыс орталығында 15 050 тонна көмір бар, оның ішінде 9 180 тонна - Шұбаркөл, 5 200 тонна - Қаражыра, 470 тонна - Майкүбі, 200 тонна - "Богатырь". ЖК «Қасымов» көмір тұйығында «Шұбаркөл» маркалы 4 800 тонна көмір бар. Кезек жоқ», - деп атап өтті ведомствода.

• 13.09.2023
• 193