Ақмола облысында "Мерейлі отбасы" байқауының жеңімпаздарына құрмет көрсетілді

«Көкшетауда "Мерейлі отбасы" ұлттық байқауының жыл сайынғы облыстық кезеңінің жеңімпаздарына құрмет көрсетілді», – деп хабарлайды облыс әкімінің баспасөз қызметі.

"Болашақ сарайының" фойесінде «Асыл аналар» қоғамдық бірлестігінің өкілдері дайындаған кондитерлік, нан-тоқаш және өзге де өнімдердің көрмесі ұйымдастырылды.

Іс-шараға Ақмола облысының әкімі Марат Ахметжанов қатысты. Өңір басшысы өзінің сөзінде Президент ұлттың басты құндылығы ретіндегі отбасының рөлін ерекше насихаттағанын атап өтті.

"Мықты және ұйымшыл отбасылар – гүлденген қоғамның көрсеткіші. Оларды танымал ету және мәртебесін арттыру мақсатында елде көптеген іс-шаралар өткізіледі. Маңыздыларының бірі - "Мерейлі отбасы" дәстүрлі ұлттық байқауы», - деді М.Ахметжанов.

Биылғы жылы өңірдің 17 ауданынан және 3 қаласынан 100 отбасы қатысуға өтінім бергенін атап өту қажет. Олардың барлығы жоғары еңбек шығармашылық және интеллектуалдық жетістіктерге ие.

Қосшы қаласынан келген Қазанғаповтар отбасына гран-при берілді. Ерлі-зайыптылар 6 бала тәрбиелеп, 19 немеренің қамқорлығына бөленген. Әулетте мұғалімдер, әскери қызметкерлер, сот жүйесінің қызметкерлері бар. Бірінші орын алған Біржан сал ауданынан Сатыбалдиновтар отбасы 12 бала тәрбиеледі, оның 8-і асырап алынған балалар. Екінші орынды Зеренді ауданынан келген Албаевтар, үшінші орынды Қосшы қаласынан келген Мәулет отбасы иеленді. Ынталандыру сертификаттарымен Бұланды ауданынан Жиряевтар, Атбасар ауданынан Лутошкиндер, Степногорск қаласынан Әубәкіровтар отбасылары марапатталды.

"Мерейлі отбасы" байқауы 10 жыл бойы өткізіліп келе жатқандығын естеріңізге саламыз, оған 1000-нан астам ақмолалық отбасылар қатысты.

• 13.09.2023
• 203