Осакаров ауданында ауыз су мәселесін шешу жалғасады

Әріптестермен бірге Осакаров ауданының тұрғындарымен кездесу өткіздік. Мұнда тұрғындарды алаңдатып отырған бірқатар мәселелер баршылық. Олардың ішінде жиі көтерілетіні сумен қамтамасыз ету.

Мысалы, Шұңқыркөл ауылында жүзден астам үй бар. Мұндағы ауыз су құбыры 80-ші жылдары салынған. Осыған байланысты келесі жылы қайта құру жұмыстарын бастауды жоспарлап отырмыз. Қазіргі уақытта біз Шұңқыркөл, Колхозное, Приишимское, Центральное, Степное ауылдарын сапалы ауыз сумен қамтамасыз ету бойынша бес жобаның құжаттарын әзірлеп жатырмыз. Мемлекеттік сараптама өткен соң қаржыландыруға өтінім беріледі.

Ал Озерное, Ералы, Пионерское, Сенокосное, Садовое, Трудовое және Николаевка ауылдарында жақын арада жаңа су құбырлары іске қосылады. Сонымен қатар Осакаровкадағы су құбыры желілерін салудың жетінші кезегі аяқталып келеді.

Сапар барысында «Балдырған» балабақшасында болдым. Мұнда жаңа топтар үшін қосымша жапсарлас ғимарат салудың мүмкіндігі баршылық. Бұл балабақшаға қабылданатын балалардың санын арттыруға ықпал етеді. Аудан басшылығына тиісті тапсырма берілді.

Орталық аудандық ауруханада заманауи жабдықтар орнатылып, гемодиализ орталығы ашылды. Сондай-ақ КТ аппараты бар. Алдағы уақытта хирургиялық жабдықтар жаңартылады.

Сондай-ақ «Жастар» балалар-жасөспірімдер орталығын араладық. Аталған ғимарат «Ауыл – Ел бесігі» бағдарламасы бойынша қайта жаңартылды. Мұнда ауылдың жасөспірімдері үшін қосымша білім беру, шығармашылықпен айналысу және техникалық қабілеттерін дамыту үшін жағдай жасалған.

Аудан тұрғындарына маңызды мәселелерді талқылауға белсенді қатысқандары үшін алғыс білдіремін.

• 15.09.2023
• 258