Ақмола облысының әкімі жолдардың жағдайын тексерді

Егіндікөл ауданына жұмыс сапары барысында Марат Ахметжанов облыстық маңызы бар бірқатар жолдардың жай-күйін тексерді.

Жалтыр-Макинск және Новочеркасское-Егіндікөл-Жантеке сияқты жолдарға тексеру жүргізілді. Жолаушылар көлігі және автомобиль жолдары басқармасының басшысы Владимир Кулаков іске асырылып жатқан жобалар бойынша облыстағы ағымдағы ахуал туралы,  сондай-ақ алдағы жылдарға жоспарлар туралы баяндады.

«Биыл Егіндікөл ауданындағы жолдарды жөндеуге шамамен  1,1 млрд. теңге бөлінді. Оның ішінде 500 миллионға жуығы Егіндікөл-Жолан жолын жөндеуге бөлінген, іске асыру мерзімі - екі жыл. Егіндікөл-Жантеке бағытындағы жолға қатысты ЖСҚ әзірленіп жатыр. Сонымен қатар, Ұзынкөл ауылының кентішілік жолдарына шамамен 140 млн теңге бөлінді», - деді Владимир Кулаков.

Айта кетейік, ағымдағы жылы облыстың жол желісінің жағдайын жақсартуға 75,2 млрд.теңге қарастырылған, соңғы үш жылда шамамен 1000 км жөндеу жоспарланған, 2 мың км-ден астам жергілікті жолдар салынды және жөнделді, оның 900 км ауылдық жерлерде.

Елордаға іргелес елді мекендердің инфрақұрылымын дамыту бойынша жұмыстар жалғасуда. Қосшы қаласы, Жібек жолы, Қараөткел, Талапкер, Жалтыркөл ауылдары және басқа да елді мекендерде ірі жобалар жүзеге асырылуда.

Тексеру нәтижелері бойынша облыс әкімі жұмыс сапасын сақтау және ағымдағы жылы жоспарланған бюджет қаражатын уақытында игеру бойынша бірқатар нақты тапсырмалар берді.

• 19.09.2023
• 195