Маңғыстаудағы креативті индустрия: өңірде IT-Hub құрылады

2023 жылдың желтоқсанында Маңғыстауда Ақпараттық технологиялар мен креативті индустрия саласын дамыту үшін Mangystau it-хаб орталығы ашылады. Бұл туралы облыс басшысы Нұрлан Ноғаевтың қатысуымен өткен облыстық жастар ісі  жөніндегі кеңестің отырысында белгілі болды, деп хабарлайды Маңғыстау облысы әкімінің баспасөз қызметі.

Кездесуде отырысқа қатысушылар жастарды еңбекке және кәсіпкерлікке баулу, жастар үшін тең мүмкіндіктер жасау, жастардың бәсекеге қабілеттілігін арттыру және жас цифрлық көшпенділерді қолдау, жастар мәдениетін дамыту және креативті индустриядағы жастар үлесін арттыру туралы мәселелерді көтерді. 

Маңғыстаудағы «Astana Hub» Халықаралық IT-стартаптар технопаркінің өкілі Әйгерім Мажтай өңірде Mangystau it-хабының ашылатынын мәлімдеді. 

Оның айтуынша, «Маңғыстау облысының Жастар ресурстық орталығы» базасында ашылатын орталықта IT-саласының мамандары оқытылмақ. 

IT-хабтың негізгі мақсаты - әлемдік ақпараттық технологиялар нарығы үшін сапалы IT-мамандарды даярлау және өңіріміздегі  цифрландыру деңгейін арттыру.

  -Мемлекет Басшысы Қасым-Жомарт Тоқаев жастар елдің қозғаушы күші екенін атап өтті. Азаматтық қоғам құруда және түрлі әлеуметтік салаларды дамытуда жастар үлкен үлес қосуда. Білімді, талантты және бәсекеге қабілетті жастар - ел болашағы. Сондықтан біз оларды әрқашан қолдауға дайынбыз. Қазір білім мен технолгияның шығармашылықтың уақыты. Күн сайын жаңа, бұрын болмаған мамандықтар пайда болып жатыр. Олар әсіресе IT технологиясымен байланысты мамандықтар. Сондықтан біздің жастар жаңа дағдыларды үйреніп, жаңа мүмкіндіктерге бейімделе білуі керек.
Біз бүгін таныстырылған әлеуметтік жобалардың осы қарқынмен келесі жылы да тиісті деңгейде жүзеге асырылуына мүдделіміз, - деп атап өтті Нұрлан Ноғаев жастармен кездесуде.

Сонымен қатар, кеште қоғамдық ұйымдардың өкілдері өңір жастарына арналған әлеуметтік жобалар көрмесін таныстырды. Бұл жастар саясаты мәселелері басқармасы қаржыландыратын, жас көшбасшыларды оқытуға, жастардың құқықтық, діни білімін арттыруға, студенттердің өзін-өзі тәрбиелеуіне, шығармашылық жастарды қолдауға бағытталған жобалар.

Маңғыстауда 14-35 жас аралығындағы жастар облыс халқының 29,8%-ын құрайды.

• 20.09.2023
• 183