Ақмола облысында 1 млрд теңгеден аса қайырымдылық көмек көрсетілді

Бүгін облыс орталығында Ақмола облысының әкімі Марат Ахметжановтың, «Қазақстан халқына» қорының басқарма төрағасы Болат Жәмішевтің, депутаттық корпус, қоғамдық ұйымдар мен жергілікті атқарушы органдар өкілдерінің қатысуымен «Өңірлерге арналған «Қазақстан халқына» қоры дөңгелек үстелі өтті.

Кездесудің күн тәртібі қордың қайырымдылық бастамалары мен іске асырылған жобалармен танысу және талқылау болды.

Конференцияны аша отырып, Марат Ахметжанов қордың жұмысы азаматтардың, сондай-ақ өмір сүрудің негізгі салаларындағы жаһандық проблемаларды шешуде үлкен көмек болып табылатынын атап өтті.

«Мемлекет басшысы Қасым-Жомарт Кемелұлы Тоқаевтың бастамаларының бірі – «Қазақстан халқына» қоғамдық әлеуметтік қоры құрылғаннан бері бір жылдан астам уақыт өтті. Қордың негізгі міндеті-еліміздің тұрғындарына жан-жақты көмек көрсетудің ықпалды құралы болу. Бүгінгі таңда Ақмола облысында «Қазақстан халқына» қоғамдық қоры жалпы сомасы 1 млрд.теңгеден асатын 11 жобаны іске асырды. Бұл орфандық аурулары бар науқастарды дәрілік препараттармен қамтамасыз ету, білім беру объектілерін арнайы жабдықтармен жарақтандыру, сондай-ақ басқа да көмек», - деп атап өтті өңір басшысы.

Болат Жәмішевтің айтуынша, дөңгелек үстел өңірдің қайырымдылық бағдарламалары мен жобаларын іске асыру жөніндегі бастамаларын талқылау және айқындау мақсатында Ұлттық қайырымдылықтың ІІ конференциясы шеңберінде өткізіледі.

«Қоғамдық-әлеуметтік қор денсаулық сақтау, білім беру және әлеуметтік қолдау саласындағы проблемаларды шешу үшін облыста жалпы сомасы 2,9 млрд теңгеге 14 қайырымдылық жобалары мен бағдарламаларын іске асыруда, жұмыста 1,2 млрд теңгеге, іске асырылғаны – 1,7 млрд теңге. Мысалы, денсаулық сақтау саласында өмірге қауіп төндіретін және орфандық аурулары бар 24 пациент үшін жалпы сомасы 663,2 млн теңгеге дәрі-дәрмек сатып алынды. Балалар нейрохирургиялық қызметін дамыту аясында «Көкшетау қаласындағы көпсалалы облыстық балалар ауруханасы» ШЖҚ МКК-ге 61 млн теңгеге жабдықтар жеткізу жоспарлануда», - деді Қордың төрағасы.

 Инженерлік құзыреттілікті дамыту мақсатында өңірдің 16 мектебінде робототехника кабинеттері ашылды, олар жалпы сомасы 57,6 млн теңгеге робототехниканы зерделеуге арналған бағдарламалық-аппараттық кешенмен жабдықталған. Екінші кезеңде «Болашақ инженерлер моноқалаларда» бағдарламасы бойынша Ақмола облысында 58,5 млн теңгеге 13 мектеп робототехника кабинеттерімен жабдықталады.

 Білім беру желісі бойынша ағымдағы оқу жылында Қор Ақмола облысының талапкерлеріне 17 білім грантын берді (А. Мырзахметов ат. университетте 8 студент, Ш. Уәлиханов ат. университетте 9 студент).

 Ақмола облысында жақсы үлгерім көрсеткен және мектептің қоғамдық өміріне белсенді қатысқан 640 балаға «Сұңқар» сауықтыру кешенінде демалыс ұйымдастырылды. Іс-шара барысында денсаулық сақтау саласындағы жаңа жобалар туралы денсаулық сақтау басқармасының басшысы Нұрлан Ақылбеков, әлеуметтік жобалар туралы жұмыспен қамтуды және әлеуметтік бағдарламаларды үйлестіру басқармасының басшысы Шолпан Рахматуллина сөз сөйледі.

Кездесу соңында Марат Ахметжанов шұғыл шаралар қолдануды талап ететін ең маңызды мәселелер талқыланғанын атап өтті. «Бұл біздің азаматтарымыздың денсаулығы мен әл-ауқатына қатысты. Бірлескен күш-жігермен тұрғындарымыздың әл-ауқатын жақсартуға бағытталған пәрменді және қажетті жобалар іске асырылатын болады», - деп қорытындылады Марат Ахметжанов.

• 21.09.2023
• 165