Қажырлы еңбекке лайықты марапаттар: Маңғыстауда Еңбек күні аталып өтті

Ақтауда Еңбек күні  мерекесіне орай облыстың үздік қызметкерлерімен салтанатты жиын өтті.
Іс-шарада өңірдің әлеуметтік-экономикалық дамуына елеулі үлес қосып жүрген  түрлі кәсіп өкілдері, оның ішінде полицейлер, дәрігерлер, мұнайшылар мен энергетиктер марапатталды, деп хабарлайды Маңғыстау облысы әкімінің баспасөз қызметі.

Жиында өмірінің ұзақ жылдарын сүйікті жұмысына арнаған жандар бас қосты. Аймақ басшысы Нұрлан Ноғаев жиылған көпшілікті мерекемен құттықтады.

"Бұл күні біз ардагерлерімізге,  еңбек адамдарына және облыс пен елдің игілігі үшін жұмыс істейтін әрбір азаматқа құрмет көрсетеміз. Сіздердің әрқайсыларыңыз облысымыз бен еліміздің дамуына елеулі үлес қостыңыздар. Біздің  негізгі мақсатымыз - тұрақты жұмыс орындарын құру. Себебі, бұл жас ұрпақтың туған жерінде өз әлеуетін жүзеге асыруы үшін негіз болады. Өңірде 
 жаңа кәсіпорындар мен зауыттар ашылып, шағын және орта бизнес секторының өркендеуі  жаңа жұмыс орындарын құруға ықпал етіп жатқаны  қуантады. Ең бастысы, жастар жұмысшы мамандықтарын игеруге дайын және біз олар  үшін барлық қажетті жағдайды ұсынамыз. Мысал ретінде,  Ақтаудағы Есенов университетінің базасындағы қазақстандық - неміс инжиниринг институтын айтуға болады. Онда студенттер жергілікті және неміс сарапшыларының басшылығымен "логистика",  "энергетикалық және экологиялық инжиниринг" салаларында оқитын болады. Бұл мемлекеттің біздің азаматтарымыздың өзін - өзі жүзеге асыруына жағдай жасауының жарқын мысалы", - деп атап өтті Маңғыстау облысының әкімі.

Өңір басшысы өз саласында жақсы нәтижелерге ие түрлі мамандықтардың үздік өкілдерін, сондай-ақ "Еңбек жолы"облыстық байқауының жүлдегерлерін марапаттады.

Марапатталғандардың қатарында Маңғыстау көпсалалы облыстық ауруханасының қызметкері Роза Үмитова бар. Ол 17 жыл бойы жалпы реанимация бөлімінде санитар болып жұмыс істейді.

15 жылдан бері ауданаралық, қалааралық және облысішілік маршруттарда тасымалдаушы болып келген Руслан Ахметнабиев де марапатсыз қалған жоқ.

Мерекелік шара жергілікті өнерпаздар қатысқан концерттік бағдарламамен аяқталды

• 25.09.2023
• 149