Ұлттық экономика вице-министрі Абзал Әбдікәрімов Ақтөбе облысындағы әлеуметтік нысандарды аралады

Жұмыс сапары барысында ол Алға ауданы Үшқұдық ауылындағы "Ауыл-ел бесігі" бағдарламасы бойынша 27,3 млн.теңгеге күрделі жөндеу жүргізілген мектеп – балабақшада болды. Сондай-ақ, мұнда 280 млн. теңгеге спорт кешенінің құрылысы жүргізілуде.

Бұдан әрі А.Әбдікәрімов "Ауыл аманаты" бағдарламасы бойынша 13,5 млн. теңге сомасындағы несие түрінде мемлекеттік қолдау алған екі жергілікті кәсіпкердің қызметімен танысты. Олар бұл қаражатты ауыл шаруашылығы өнімін ұлғайтуға ықпал ететін жылыжай шаруашылықтарын ашуға жұмсаған. "Абаттандырған ауыл" жобасы бойынша балалар ойын алаңы салынған "Жанұя" саябағы абаттандырылған. Жобаның құны 13,7 млн. теңге. Нысан 2021 жылы пайдалануға берілді.

Сонымен қатар, Үшқұдық ауылында 79 млн. теңгеге Мәдениет үйі жөнделді. Коворкинг орталығы мен шығармашылық үйірмелер жұмыс істейтін мәдени нысан барлық ниет білдірушілер үшін ашық.

Осында вице-министр жергілікті тұрғындармен кездесу өткізді. Атап айтқанда, су тарифінің өсуі, бөгеттерді жөндеу, Тамды ауылында дене шынықтыру-сауықтыру кешенін салу, көшелерді жөндеу және Қарақұдық ауылының тұрғын алабына газ жүргізу мәселесі қозғалды.

А.Әбдікәрімов барлық айтылған ұсыныстар бойынша Министрліктің ұстанымын жеткізді. 

Оның сөзінше, ауылдардағы өмір сүру деңгейі Ауылдық аумақтарды дамыту тұжырымдамасы, "Ауыл - ел бесігі" бағдарламасы және "Ауыл аманаты" жобасы шеңберінде жақсаратылады. Барлық тірек ауылдық елдімекендер алдағы жылдары минималды стандарттарға жеткізілетін болады.

• 29.09.2023
• 132