Ұлттық экономика Вице-министрі Абзал Әбдікәрімов Ақтөбе облысындағы коммуналдық кәсіпорындардың жұмысын тексерді

Өңірге жұмыс сапары кезінде ол Ақтөбе қаласындағы "Ақтөбе ЖЭО" АҚ-ның 22,5 млрд. теңге сомасына жылу энергиясын өндіру жөніндегі инвестициялық бағдарламасының іске асырылу барысымен танысты. Бүгінде кәсіпорында 6 су жылыту қазандығы, 7 бу қазандығы және 6 турбоагрегат бар. Мұнда жылу-электр энергиясын беру кезіндегі шығынды азайтуға, жабдықтардың тозуына және экологиялық параметрлерді жетілдіруге бағытталған жабдықтарды салу, реконструкциялау және жаңғырту жұмыстары жалғасуда.

Сондай-ақ, ол "Aqtobe su-energy group" АҚ-да болды. Мұнда нысандар құрылысының орташа тозуы 64,5% деңгейінде. Бүгінгі таңда сумен жабдықтау және кәріз нысандары 3,7 млрд. теңгеге жаңғыртылған. 

Айта кетейік, "Aqtobe su-energy group" АҚ Ақтөбе қаласында сумен жабдықтау, су бұру және жылумен жабдықтау бойынша қызмет көрсетеді.

Жұмыс сапарының соңында вице-министр "Энергожүйе" ЖШС-қа барды. Коммуналдық кәсіпорынның балансында 14 308 шақырым электр желісі, 174 қосалқы станция бар. Тозу деңгейі 70%-дан асады. Нысан 2003 жылы пайдалануға берілді. 

Бүгінгі таңда инженерлік желіні жаңғырту және реконструкциялау арқылы құрылыстардың тозу жағдайын жақсартуға бағытталған 2021–2025 жылдарға арналған шамамен 17 млрд.теңге сомасындағы инвестициялық бағдарлама іске асырылуда.

• 29.09.2023
• 172