Маңғыстауда батыс өңірдің жас көшбасшыларына арналған инновациялық лагерь- «Caspian Camp»басталды

26 қыркүйекте аймақ басшысы Caspian Camp аясында батыс өңірінің жастар көшбасшыларымен бейресми кездесу өткізді. Іс-шараға Ақтау, Ақтөбе, Орал және Атырау қалаларынан келген жастар қатысты, деп хабарлайды Маңғыстау облысы әкімінің баспасөз қызметі.

Үш күнге созылатын лагерь 26-28 қыркүйек аралығында демалыс базасының аумағында өтеді. Мұнда батыс аймақтарынан жиналған 70-тен астам қатысушы көшбасшылық, жобалық басқару, тайм-менеджмент, коммуникативтік дағдылар, бейресми білім, ақпараттық технологиялар мен инновациялар, тарих пен мәдениет сияқты маңызды тақырыптарға арналған сегіз сессияға қатысады.

Лагерьге жастар ұйымдарының өкілдері, ерікті белсенділер, студенттер, үкіметтік емес ұйымдардың мүшелері, мүмкіндігі шектеулі жастар жиналды. 

Нұрлан Ноғаев жастардың елдің қоғамдық өміріне белсенді қатысуы, тың идеяларды ұсынуы және оларды іске асыруда көшбасшы болуы тиіс екенін атап өтті.

-Мемлекет Басшысы Қасым-Жомарт Тоқаев жастарды инклюзивті және инновациялық қоғам құруда белсенді болуға шақырды. Президентіміз жас қазақстандықтардың орасан зор әлеуетке ие екенін айтып, жастар дағдыларын үнемі жетілдіріп, өмірдің барлық салаларында дамуы қажеттігін, әсіресе тіл үйренуде алда болуы керектігін атап өтті. Сіздер - ұлттың қозғаушы күшісіздер, сіздердің ел болашағына қосқан үлесіңіз өте маңызды, - деп атап өтті Нұрлан Ноғаев.

Лагерь аясында жас қатысушылар түрлі саладағы сарапшылармен тәжірибе және идея алмасады. Сонымен қатар, батыс аймақтық жас көшбасшылар қауымдастығы құрылады.

• 29.09.2023
• 123