Ақмола облысының әкімі Марат Ахметжановтың Халықаралық қарттар күнімен құттықтауы

Құрметті ақмолалықтар, қымбатты ардагерлер!

 Сіздерді Халықаралық қарттар күнімен шын жүректен құттықтаймын! Аға буын – ерен еңбекқорлық пен теңдесі жоқ төзімділікті кейінгі ұрпаққа өнеге ететін адамдар. Әрине, біздің рухани және материалдық байлығымыз Сіздердің адал еңбектеріңізбен жиналды. Қалалар салынды, өнеркәсіп дамыды, денсаулық сақтау және білім жүйесі жетілдірілді. Бірақ, ең басты мұра – даналық пен баға жетпес өмірлік бай тәжірибе.

Мемлекет басшысы Қасым-Жомарт Тоқаевтың саясатының маңызды бағыты аға буын өкілдеріне шынайы қамқорлық жасау болып қала береді. Елімізде қарттарды әлеуметтік қолдау шараларының тұтас кешені жүзеге асырылуда. Зейнетақы мен қамсыздандырудың тиімділігі артуда, аға буын өкілдерін қоғамдық өмірге араластыру бойынша бағдарламалар жұмыс істейді. Мұқтаж жандарға материалдық көмек көрсетіледі.  

Құрметті ардагерлер!

Сіздер – халқымыздың даналығы мен ғажайып салт-дәстүрін сақтаушыларсыздар, біздің жастарымыз үшін өміршең өнегесіздер. Бүгінгі күні зейнет демалысында болсаңыздар да өмір бойы көкейлеріңізге түйген жақсылықты, білім мен тәжірибені кейінгі жастарға мұра етіп, жарқын жол сілтеп келе жатырсыздар.

Сіздердің адалдықтарыңыз үшін ризашылығымды білдіремін. Отанымыздың игілігі үшін адал еңбек еткен сіздер қандай құрметке болсын лайықсыздар. Бүгінгі әдемі мерекеде сіздерге мықты денсаулық, ұзақ ғұмыр және ет жақын-туыстарыңызға амандық тілеймін!    

• 02.10.2023
• 145