Маңғыстауда дзюдодан халықаралық Азия кубогі басталды

Ақтауда Халықаралық дзюдо федерациясының күнтізбесіне сәйкес ұйымдастырылған ерлер мен әйелдерге арасындағы Asian open дзюдодан халықаралық турнирінің ашылу салтанаты өтті. Маңғыстау облысының құрметті азаматы Тұрар Жолдыбаевты еске алуға арналды, деп хабарлайды Маңғыстау облысы әкімінің баспасөз қызметі.

Кубоктің ашылу салтанатына Азия дзюдо одағының бас төрешісі-Осако Акинобу, Қазақстан Республикасы Дзюдо федерациясының бас хатшысы Асхат Жіткеев, Маңғыстау облысы дзюдо федерациясының президенті Асылбек Жолдыбаев сынды көптеген құрметті қонақтар қатысты. 

Тұрар Жолдыбаевты еске алуға арналған жарыста 250-ге жуық татами шебері бақ сынауда. Маңғыстау өңірінің намысын 14 спортшы қорғайды. Жарысқа Қазақстанның үш қаласы мен 17 облысынан дзюдошылар, сондай-ақ Армения, Әзірбайжан, Гонконг, Қытай, Қырғызстан, Тәжікстан, Өзбекстан және Габон елдерінен спортшылар қатысуда. 

Өңір басшысы Нұрлан Ноғаев жиналғандарды құттықтап, Маңғыстау халқының 40% - дан астамы дене шынықтырумен және спортпен шұғылданатынын атап өтті. Бұл өңірдегі спортты дамытудың маңызды көрсеткіші болып табылады. 

- Тұрар Жолдыбаев атындағы Халықаралық ашық Азия Кубогы 14-ші рет өткізіліп отыр. Біздің өңірде он мыңнан астам спортшы дзюдомен айналысады және олардың көпшілігі республикалық және халықаралық жарыстарда еліміздің намысын қорғап, жоғары нәтиже көрсетіп жүр. Олимпиада ойындарында бұл жетістіктер ерекше жарқын байқалмақ. Онда біздің спортшылар өз шеберліктерін көрсетіп, Қазақстанның атын мақтанышпен таныстырмақ. 2024 жылы Олимпиада ойындарында біздің еліміздің жарқын жеңістерін көретінімізге нық сенімдімін, - деп атап өтті Маңғыстау облысының әкімі Нұрлан Ноғаев.

Жарыстың бірінші күнінің нәтижесінде Қазақстан құрамасының атынан 60 кг салмақ дәрежесінде Мерей Марханбетов қола жүлдегер атанды. Ал күміс жүлдені маңғыстаулық Бауыржан Нарбаев иеленді. Алтын медаль қазақстандық спортшы Алдияр Қарғұловқа бұйырды. Сондай-ақ, 66 келі салмақ дәрежесінде Алмас Ғалымов, 73 келі салмақ дәрежесінде Ислам Тоқтасын, қыздар арасында 48 келі, 52 келі, 57 келі және 63 келі салмақ дәрежелерінде Қытай дзюдошылары жеңімпаз деп танылды.

• 09.10.2023
• 153