БІЛІМ САПАСЫН АРТТЫРУ МАҚСАТЫНДА ЖҮЙЕЛІ ЖҰМЫСТАР ЖҮРГІЗІЛУДЕ

Оқу-ағарту министрлігі білім сапасын арттыру және білім алу мүмкіндігін кеңейту бағытында жүйелі шараларды жүзеге асыруда. Барлық көрсеткіштер білім беру саласының негізгі стратегиялық және бағдарламалық құжаттарына: ҚР мектепке дейінгі, орта, техникалық және кәсіптік білім беруді дамытудың 2023 - 2029 жылдарға арналған тұжырымдамасына, «Жайлы мектеп» ұлттық жобасына, ҚР Оқу-ағарту министрлігінің Даму жоспарына біріктірілген. Бүгінгі таңда ұстаздардың біліктілігін арттыруға арналған барлық оқыту бағдарламалары инклюзивті білім беру пәндерін қамтиды. Айта кетейін, апатты, үш ауысымды мектептер мен оқушылар орнының тапшылығын шешу үшін соңғы үш жылда ғана 380 мың орындық 626 мектеп пайдалануға берілді.
Биыл 137 мың орындық 165 мектепті пайдалануға беру жоспарлануда. Бұл өз кезегінде осы жылы 12 апатты және 29 үш ауысымды мектеп мәселесін шешуге мүмкіндік береді. Жалпы, мектеп инфрақұрылымын дамыту мақсатында «Жайлы мектеп» ұлттық жобасы бекітілді. Жоба аясында 2024–2025 жылдары 740 мың орындық 369 мектепті пайдалануға беру жоспарлануда.
Еске салайын, биылғы оқу жылында 200-ге жуық мектеп күрделі жөндеуден өтті. Мемлекет басшысының тапсырмасы бойынша жыл соңына дейін шағын қалаларда, аудан орталықтарында және ауылдарда орналасқан 1000 мектеп алты бағыт бойынша жаңғыртудан өтеді: күрделі және ағымдағы жөндеу жұмыстары жүргізіледі, пән кабинеттерімен жабдықталады, мектеп жиһаздары, кітапханалар, асханалар жаңартылады және балалардың қауіпсіздігі қамтамасыз етіледі.

• 10.10.2023
• 129