Маңғыстауда жол инфрақұрылымының жағдайын талқылады

Маңғыстаудағы облыстық және аудандық маңызы бар автомобиль жолдарының жалпы ұзындығы 1 944 шақырымды құрайды. Олардың 96% - ы белгіленген нормалар мен стандарттарға сәйкес келеді. Бұл туралы аймақ басшысының қатысуымен өткен аппараттық кеңесте белгілі болды, деп хабарлайды Маңғыстау облысы әкімінің баспасөз қызметі.

Маңғыстау облысының жолаушылар көлігі және автомобиль жолдары басқармасының басшысы Адайбек Қалиев 2023 жылы жергілікті жол желісін қаржыландыру 8,4 миллиард теңгеге жеткенін айтты. Оның 1 миллиард теңгесі республикалық бюджеттен, 2,9 миллиард теңгесі Ұлттық қордан, ал 4,5 миллиард теңгесі жергілікті бюджеттен бөлінді. 

Бұл қаражат облыстағы 238,4-нан астам шақырым жергілікті автомобиль жолдарына құрылыс және жөндеу жұмыстарын жүргізу үшін пайдаланылатын болады. Түпкі мақсат - ағымдағы жылдың соңына дейін жолдардың нормативтік жағдайын 97%-ға дейін жеткізу. 

Адайбек Қалиев 2023 жылғы "Ауыл – ел бесігі" бағдарламасы аясында Бейнеу, Түпқараған, Қарақия, Мұнайлы және Маңғыстау аудандарында және Ақтау қаласында кентішілік автомобиль жолдарын салу және реконструкциялау жұмыстарының жүргізіліп жатқанын айтты. Осы мақсаттарға арналған жалпы бюджет құны 5 миллиард 304 миллион теңгені құрайды. Бұл қаражат ауылдардың жол инфрақұрылымын қамтитын жалпы ұзындығы 185 шақырым болатын 51 жобаға бағытталған.

Өңір басшысы Нұрлан Ноғаев осы бағытта жұмысты жалғастыру қажеттігін атап өтті. 

- Біздің өңіріміздегі автомобиль жолдарының сапасы еліміздегі жоғары деңгейлі жолдардың қатарына жатады. Біз мұнымен тоқтап қалмай, қазіргі уақытта ағымдағы жөндеу жұмыстарын жүргізуді және жаңаларын салуды белсенді жүргізіп жатырмыз. Мемлекет Басшысы Қасым-Жомарт Тоқаев Халықаралық және Республикалық маңызы бар жолдарды салу, реконструкциялау және жөндеу бойынша жұмыстарды орындаудың өзектілігін бірнеше рет атап өтті. Бұл біздің халық алдындағы міндетіміз ғана емес, сонымен қатар біздің экономикалық және әлеуметтік дамуымыздың кепілі. Біздің міндетіміз - азаматтардың жайлы жүріп-тұруын және өңіріміздің үздіксіз дамуын қамтамасыз ету үшін осы бағытта қажырлы еңбек ету, - деп атап өтті Нұрлан Ноғаев.

• 11.10.2023
• 114