ҚР ҰЭМ мен ЭЫДҰ қазақстандық мемлекеттік басқару жүйесіне шолу жүргізу туралы келісімге қол қойды

Парижде (Франция) Ұлттық экономика министрі Әлібек Қуантыров Экономикалық ынтымақтастық және даму ұйымының басшылығымен кездесу өткізді.

Тараптар бұрын қол жеткізілген уағдаластықтардың іске асырылу барысын, оның ішінде Қазақстан экономикасының түрлі салаларында ЭЫДҰ-ның құқықтық құралдары мен жоғары стандарттарын енгізуді қарастырды.

ЭЫДҰ мемлекеттік басқару директоратының басшысы Эльза Пилишовскимен Ұйымның стандарттарына сәйкес әкімшілік реформаны жетілдіру мәселелері талқыланды.

Кездесу қорытындысы бойынша тараптар Қазақстандық мемлекеттік басқару жүйесіне шолу жүргізу туралы келісімге қол қойып, осы саладағы ынтымақтастықты жалғастыру туралы уағдаласты.

Келісімге қол қою Қазақстанның ЭЫДҰ елдерінің озық тәжірибелерін енгізуге ұмтылысын растайтын екіжақты ынтымақтастықтың стратегиялық маңызды кезеңі болып табылады. Келісім шеңберінде Қазақстан мен ЭЫДҰ елдері арасындағы негізгі басымдықтарды салыстырмалы талдауды қамтамасыз ететін мемлекеттік басқару жүйесіне шолу жасалады.

Сондай-ақ, ҚР-да ЭЫДҰ тәжірибесін қолдану үшін тиісті ұсынымдар әзірленеді. Жалпы, Келісім ЭЫДҰ-мен келешектегі өзара іс-қимылға ықпал етіп, ЭЫДҰ Мемлекеттік басқару комитетінде "қатысушы" ретінде ынтымақтастық орнатуға мүмкіндік береді.

• 13.10.2023
• 177