«МЕН АБАЙДЫ ОҚИМЫН» АКЦИЯСЫ ӨТТІ

Қазақ халқының маңдайына біткен ғұлама, ойшыл, ақын, ағартушы, жазушы, тамаша қара сөздердің авторы Абай Құнанбайұлының туғанына 175 жыл толуына орай ел көлемінде түрлі шаралар ұйымдастырылды.
Соның бірі, Ақтау гарнизонындағы 51809 әскери бөлімінде санитарлық-эпидемиологиялық талаптар мен нормаларды сақтай отырып, «Мен Абайды оқимын» атты тақырыбында ауқымды кеш ұйымдастырылды.
Кештің басы Абай Құнанбаевтің өмірін сипаттайтын бейне материалмен басталды. Аталған шараға әскери бөлім басшыларымен мекеменің жеке құрамы толықтай қатысты.
«Ұлы ақын Абай мұрасының тигізер пайдасы зор деп есептеймін. Оның шығармалары бүгінде өзектілігін жоғалтқан жоқ. Абайдың ой-тұжырымдары баршамызға қашанда рухани азық бола алады», - деп 51809 әскери бөлім командирі подполковник Әділ Сүбебаев шараны бастады.
Жарыс төрт бөлімнен тұратын сайыс түрінде өткізілді. Жеңімпаздар Абайдың қара сөздері, аудармалары, өлеңдері және поэмалары бойынша номинацияларға ие болды және де көрермендер арасында белсенді әскери қызметшілер Абайдың өлеңдерін, әндерін толықтырып, кешті одан әрі қызықты өтуіне септігін тигізді.
51809 әскери бөлім командирінің тәрбие және идеологиялық жұмыстар жөніндегі орынбасары подполковник Бақыт Сыдықов ұлы ақынның өмір жолы мен шығармашылық еңбегіне тоқталып өтті. Абайдың өсиет сөздері барлық тыңдармандарға, болашақ ұрпақтарға бере үлгісі мол екенін айтты.
Айта кетейік, шара соңында әділ қазы мүшелері бөлім командирінің атынан жарыс жеңімпаздарын марапаттады. Сондай-ақ оларға естелік Абайдың кітаптарын табыстады.

• 12.01.2021
• 262