АЛМАТЫ ОБЛЫСЫНЫҢ ТҰРҒЫНДАРЫМЕН КЕЗДЕСТІМ

Алматы облысына жұмыс сапарымның барысында өңір тұрғындарымен кездесу өткіздім. Азаматтардың ұсыныстарын тыңдап, ведомство тарапынан қабылданып жатқан негізгі міндеттер туралы баяндадым.

Кездесуде сапалы білім беру, педагогтердің кәсіби дамуы және біліктілік тестілеуін өткізу ережелеріндегі өзгерістер туралы ақпарат бердім. Мемлекет басшысының тікелей қолдауымен 2019 жылы маңызды мәселелердің бірі — педагог мамандығының мәртебесі бекітілді. Мұғалімдердің жалақысы көтеріліп, жұмыс жағдайы жақсарды. Артық функциялардан босатылып, кәсіби даму мүмкіндіктері қарастырылды. Министрлік аттестаттау жүйесін жетілдіру жұмыстарын жүргізуде. Біз білім беру жүйесін үздіксіз дамыту үшін бар жағдайды жасауымыз керек. Әр мұғалімнің еңбегі оқушының жетістіктерімен бағалануы керек деп есептейміз. Ол үшін Ұлттық платформа базасында мұғалімдерді аттестаттау процесін автоматтандыру жұмыстары жүргізілуде. Ол объективті және ашық болуы тиіс. Алматы облысында барлығы 33 мыңға жуық педагог жұмыс істейді. Оның 4 мыңнан астамы - зерттеуші, 138-і шебер.

Сондай-ақ, аудандық білім бөлімдерінің, әдістемелік орталықтардың басшыларымен кездесу өткіздім. Онда тәрбие жұмысы, балалардың қауіпсіздігін қамтамасыз ету, тамақтандыруды ұйымдастыру, оқушыларды тасымалдау, инфрақұрылымды дамыту мәселелері талқыланды.

Кездесу барысында білім басқармаларының және аумақтық департаменттердің басшылары Білім беруді дамытудың жол картасы шеңберінде атқарылған жұмыстар туралы есеп берді. Жаңа оқу жылынан бастап еліміздегі барлық мектептерде Ата-аналарды педагогикалық қолдау орталықтары ашылған болатын. Олардың басты міндеті - балаларды оқыту мен тәрбиелеуде отбасы мен мектептің өзара байланысын нығайту, позитивті ата-ана мәдениетін дамыту. Сонымен қатар, министрлік 2023-2025 жылдарға арналған Біртұтас тәрбие бағдарламасын қабылдады.

• 17.10.2023
• 175