Маңғыстауда әскери міндеткерлер "Батыл тойтарыс-2023" тактикалық-арнайы оқу-жаттығуынан өтті

Облыста өңір басшысы Нұрлан Ноғаевтың басшылығымен "Батыл тойтарыс-2023" тактикалық-арнайы оқу-жаттығуы өтті, деп хабарлайды Маңғыстау облысы әкімінің баспасөз қызметі.

25744 әскери бөлімінің "Оймашы" полигонында тактикалық-арнайы оқу-жаттығуы өтті. Оған 5 офицер, 15 сержант және қатардағы жауынгерлерден тұратын 78 адамнан құралған Маңғыстау облысының аумақтық қорғаныс ротасы, Жаңаөзен қаласының әскери міндеткерлері қатысты. 

Сондай-ақ оқу-жаттығуға ҚР Қарулы Күштерінің Құрлық әскерлері, Әскери-теңіз күштері және Әуе қорғанысы күштері бөлімшелерінің әскери қызметшілері мен жауынгерлік техникасы жұмылдырылды.
"Батыс тойтарыс - 2023" тактикалық-арнайы оқу-жаттығуы ағымдағы жылдың 9-18 қазан аралығында Маңғыстау облысы әкімдігінің қаулысына сәйкес ҚР Қарулы Күштері Бас штабының келісімімен өтті. 

Жаттығу алдында жауынгерлік техникамен танысытырылым ұйымдастырылды. Оқу-жаттығу сценарийі бойынша заңсыз қарулы құрылымдар еліміздің аумағындағы қимылдарын бастады. Осыған орай Маңғыстау облысы әкімдігінің шешімімен өңірде аумақтық қорғаныс жоспары қолданысқа енгізіліп, әскери және мемлекеттік объектілерді күзету және қорғау күшейтілді. Облыстық жедел штаб құрылды. 

Заңсыз қарулы құрылымның диверсиялық-барлау топтарының негізгі көздегені, халықтың бір бөлігі өмір сүретін маңызды әлеуметтік және мемелкеттік объектілері, өмір сүруді қамтамасыз ету объектілері болуы мүмкін. Маңғыстау облысының аумақтық қорғаныс роталарының әскери міндеткерлері заңсыз қарулы құралымдардың диверсиялық әрекеттерінің алдын алды. 

Тактикалық-арнайы оқу-жаттығуларды өткізу барысында ҚР ҚК Құрлық әскерлерінің, Әскери-теңіз күштерінің және Әуе қорғанысы күштерінің бөлімшелерімен өзара іс-қимыл ұйымдастырылды. Қарақия ауданындағы "Құрық" теңіз портында аталған жасақтар сценарий бойынша белгіленген шартты шабуылға қарсы тойтарыс беруде өз шеберліктерін көрсетті.

Жиын соңында әскери міндеткерлерді марапаттау рәсімі өтті. Өңір басшысы оларға тактикалық-арнайы оқу-жаттығуға белсенді қатысқаны үшін алғыс хаттар табыс етті.
 
- Сіздер Қазақстан Республикасы азаматтарының қауіпсіздігі мен бейбіт болашағы үшін елеулі үлес қосып келесіздер. Сіздердің әрқайсыларыңыз алдыңғы шепте тұрып, мемлекеттік шекараларды абыроймен, аса батылдықпен қорғайтыныңызға сенімдіміз. Қазақстан Республикасының Жоғарғы Бас қолбасшысы, Президент Қасым-Жомарт Кемелұлы Тоқаевтың қолдауымен қажетті техника, қару-жарақ пен қорғаныс құралдарын қоса алғанда, сіздердің тиімді жұмыстарыңыз үшін барлық жағдай жасалуда. Шекара қауіпсіздігі – мемлекеттің тұрақты дамуының кепілі. Сіздер әрқашан Президент пен Қазақстан халқы белгілеген жоғары стандарттарға сай болатыныңызға күмәніміз жоқ. Біз сіздерден төзімділік, батылдық, кез келген ықтимал қауіптерден шекарамызды қорғауда табандылық пен қырағылық күтеміз, - деп атап өтті облыс әкімі Нұрлан Ноғаев.

• 18.10.2023
• 117