Маңғыстауда Ақтау қаласының 60 жылдығына арналған салтанатты іс-шара өтті

Ақтауда өңір басшысы Нұрлан Ноғаевтың қатысуымен қаланың 60 жылдығын атап өтті. Салтанатты рәсімде қаланың әлеуметтік-экономикалық дамуына үлес қосқан 60 азамат мерейтойлық медальмен марапатталды. Іс-шара барысында Қазақстан Жазушылар және Журналистер Одағының мүшесі, Түрксой халықаралық сыйлығының лауреаты Наталья Задерецкаяның "Ақтауға 60 жыл. Ақтауға деген махаббатпен" кітабы таныстырылды, деп хабарлайды Маңғыстау облысы әкімінің баспасөз қызметі.

Іс-шараға қаланың алғашқы күндерінен бастап қалыптасуына үлкен үлес қосқан әр түрлі саладағы еңбек ардагерлері, сондай-ақ қала тұрғындары қатысты.

Мәдени шарада «Ақтауға 60 жыл. Ақтауға деген махаббатпен» атты кітаптың таныстырылымы өтті. Туынды шөл далада оазис орнатқан азаматтар туралы сыр шертеді. Кітап он тараудан тұрады. Онда Ақтау қаласының тарихы, алғашқы құрылысшылар, қаланың денсаулық, спорт, білім саласында жасалған жұмыстары жазылды. 246 беттік кітап қазақ, орыс және ағылшын тілінде 1000 дана тиражбен шығарылды. Кітаптың лентасын Ақтау қаласының қалыптасуына үлес қосқан азаматтар Николай Баев пен Совет Татамбаев қиды.

Сондай-ақ, Абай атындағы мәдени-демалыс кешенінің фойесінде ардагер фотограф Виктор Малюк ұйымдастырған және қаланың 60 жылдығына арналған фотокөрме өтті. 

Маңғыстау облысының әкімі Нұрлан Ноғаев қала тұрғындарын осы айтулы мерекемен құттықтады.

-Қарт Каспийдің жағасында орналасқан ару қала - Ақтау алуан бейнелі, сан қырлы, тарихи тұрғыдан да көп қатпарлы шаһар. Қаланың қалыптасу тарихы  өлке экономикасының өркендеу кезеңдерімен тұспа-тұс келеді.  Қойнауы қазынаға толы құтты мекен ХХ ғасырда Маңғыстау түбегінде мұнай-газ, уран рудасы, битум, ұлутас, фосфориттер өндірісі сынды индустриалды үдерістердің жандануы Одақтың сан тарабынан ағылған жаңа қоныстанушылардың санының артуына септесті. Ал қазіргі таңда Ақтау қаласы Қазақстанның туристік орталығына айналып отыр. Әсіресе Президент Қасым-Жомарт Тоқаев өңірге жасаған сапарында Каспий жағалауындағы мемлекеттермен бірлескен халықаралық жобаларды жүзеге асыруды қарастырып, әсіресе, круиз туризмін дамытуға шақырған болатын. «Маңғыстаудың ең ұтымды тұсы – Каспий теңізінің жағасында орналасуы. Соның арқасында жағажай туризмін дамытуға мүмкіндік бар», деген болатын Мемлекет басшысы. Осының бір дәлелі Ақтауда іске асырылып жатқан «Жылы жағажай» инфрақұрылымды дамыту жобасы осы бағытта жүзеге асырылып жатқан  ауқымды жобаның бірі. Қаламыз әрқашан өркендеп, дами берсін, - деді Маңғыстау облысының әкімі Нұрлан Ноғаев.

Ақтау 1963 жылы Каспий теңізінің жағасында бой көтерді. Қаланың архитектуралық жоспарын Михаил Ильич Левин жасаған. 

Қазіргі уақытта Ақтау қаласының халық саны 278 784 адамды құрайды, бұл облыстың жалпы халқының 35,7%-ы. Биыл қаланың негізгі капиталына 108,8 миллиард теңге инвестиция салынды. Тек 2023 жылы құны төрт миллиард теңге болатын екі жоба іске қосылды. Сонымен қатар, осы жылдың соңына дейін жалпы құны 29,7 миллиард теңге болатын екі инвестициялық жобаны бастау жоспарланып отыр, бұл 150 жаңа жұмыс орнын құруға мүмкіндік береді. 

Ақтаудың туризм саласында айтарлықтай даму байқалады. Биыл жазғы маусымда қалаға келген туристер саны өткен жылмен салыстырғанда 38% - ға өсті. Жыл басынан бері қалаға 250 мыңнан астам турист келді.

• 19.10.2023
• 175