Маңғыстауда 2024 жылы көтерме-тарату орталығын ашу жоспарланған

Әлеуметтік маңызы бар азық-түлік тауарларының бағасын тұрақтандыру жөніндегі жобаларды іске асыру өңір басшысы Нұрлан Ноғаевтың төрағалығымен өткен аппараттық кеңесте қаралды. Басты тақырыптардың  бірі - "Ақтау ОРЦ" көтерме-тарату орталығының құрылысы, деп хабарлайды Маңғыстау облысы әкімінің баспасөз қызметі. 

Маңғыстау облысының кәсіпкерлік және сауда басқармасының басшысы Дастан Мұраталиев өңірдегі бағаны тұрақтандыру шаралары туралы баяндама жасады. 

Оның айтуынша, қазір Ақтауда құны 3,5 миллиард теңгені құрайтын "Ақтау ОРЦ" көтерме-тарату орталығының құрылысы жүргізілуде. Онда 24 мың тонналық құрғақ қойма және 54 мың тонналық климаттық қоймалар болады, бұл бір уақытта 20 мың тонна көкөністі қоса алғанда, үлкен көлемдегі өнімдерді сақтауға мүмкіндік береді. Орталықтың ашылуы 2024 жылы күтілуде, содан кейін аймақтағы көкөністерді сақтау көлемі екі есе артады, бұл бағаны тұрақтандыруға ықпал етеді және тұтынушыларға өнімді тікелей өндірушіден сатып алуға мүмкіндік береді.

Бағаны тұрақтандырудың тағы бір маңызды қадамы Ақтауда коммуналдық базардың салынуы болып табылады. Жоба нарықтық бағадан 50% төмен жалға берілетін 100 сауда орнын құруды көздейді. Нысанды 2025 жылы пайдалануға беру жоспарланған. 

Ішкі нарықты жергілікті өніммен қамтамасыз ету мақсатында қалалар мен аудандардың әкімдіктерімен ынтымақтастықта қазіргі уақытта Азық-түлік саласындағы ірі инвестициялық жобалар іске асырылуда. 

Сонымен қатар, 2023 жылдың басынан бері Жаңаөзендегі "Көркем Әлем" ет комбинаты 8 мың тонна ет пен ет өнімдерін ұсына отырып, толық қуатта  жұмыс істеуде. 
Мұнайлы ауданында жеке кәсіпкер жыл сайын 190 тонна қияр мен қызанақ беретін жылыжай кешенін пилоттық жоба режимінде іске қосты. 

Атқарлып жатқан жұмыстардың барлығының мақсаты- азық-түлік бағасын тұрақтандыру. Осы мақсатқа 2019 жылы жергілікті бюджеттен 4,8 млрд теңге бөлінді, бұл қаражат тұрақтандыру қорын қалыптастыруға және жалпы көлемі 9,8 мың тонна болатын 11 тауар қорын құруға бағытталады. Оның ішінде тауарларды өндіруге және белгіленген бағамен жеткізуге 1,6 миллиард теңге бөлінген. Бұл 10 кәсіпорынға 5,9 тонна болатын 11 түрлі тамақ өнімдерін төмен пайыздық мөлшерлемемен жүзеге асыруға мүмкіндік береді. Аталған шаралар халық үшін азық-түліктің қолжетімділігі мен тұрақтылығын қамтамасыз етуге бағытталған және осы маңызды салада жергілікті кәсіпкерлікті дамытуға ықпал етеді.

Айта кетейік, жыл басынан бері 380 тонна тауар тұрақтандыру қоры арқылы сауда желілеріне жеткізілді. Әр аудандық және қалалық орталықта апта сайын ауыл шаруашылығы тауарын өндірушілер мен көтерме жеткізушілердің жәрмеңкелері өтеді, онда азық-түлік тауарларының бағасы нарықтық бағадан 15-20% төмен. "Дана", "Дина", "Анвар", "Лидер", "Алтынфуд" және супермаркеттерді қоса алғанда, 283 сауда объектілерімен меморандумдар жасалды, онда ӘМАТ өнімдеріне сауда үстемесін 15% - дан асырмау бекітілген. 

Өңір басшысы Нұрлан Ноғаев азық-түлік бағасын төмендету бойынша жүргізіліп жатқан шаралардың маңыздылығын атап өтті.

- Президент Қасым-Жомарт Тоқаев Маңғыстау облысына сапары барысында 2021 жылы біздің өңірде көтерме тарату орталығын салу туралы тапсырма берді. Бұл жобаны аяқтау тұтынушыларға делдалсыз тікелей фермерлерден азық-түлік сатып алуға мүмкіндік береді. Өз кезегінде азық-түлік бағасының төмендеуіне ықпал етеді. Бұл, аймақтың географиялық ерекшеліктері мен климаттық жағдайлары және су тапшылығын ескеретін болсақ, өңір үшін айтарлықтай жетістік. Қазіргі уақытта әртүрлі аудандар мен қалаларда жәрмеңкелер өткізіліп, бірнеше жобалар қатар жүзеге асырылуда. Осыған қарамастан, аталған бағытта атқарылатын жұмыстар әлі бар, - деп атап өтті Нұрлан Ноғаев.

• 19.10.2023
• 166