Үкіметтің «Қарызсыз қоғам» жобасын кеңейту жөніндегі шаралары

Бүгін Премьер-Министрдің орынбасары - Қаржы министрі Ерұлан Жамаубаев халықтың кредиттелуін төмендету және қаржылық сауаттылығын арттыру туралы Парламенттік тыңдауда «Үкіметтің «Қарызсыз қоғам» жобасын кеңейту жөніндегі шаралары» туралы баяндама жасады.

Өз сөзінде ол 6 негізгі бағыт бойынша 25 іс-шараны қамтитын Жол картасы әзірленгенін және бекітілгенін атап өтті.
Барлық тараптардың күш-жігерін шоғырландыру үшін мемлекеттік органдар мен «Amanat» партиясы арасында ынтымақтастық туралы Меморандум жасалды.

Негізгі шара Республикалық маңызы бар 3 қалада және еліміздің 17 өңірінде халықпен тікелей жұмыс істейтін өңірлік жобалау кеңселерін құру болып табылады.

Жобалық кеңселердің негізгі міндеті азаматтарға кредиттер бойынша мерзімі өткен берешекті реттеуге көмек көрсету, қаржылық алаяқтықтан қорғау, сондай-ақ банкроттық, жұмысқа орналасу және бизнесті қолдау шараларын алу мәселелері бойынша жәрдемдесу болады.

Ерұлан Жамаубаев сондай-ақ банкроттық рәсімін қолдану және жеке тұлғалардың төлем қабілеттілігін қалпына келтіру туралы айтып өтті. Жеке тұлғалардың банкроттығы жөніндегі «Qoldau» жаңа ақпараттық жүйе іске қосылды. Бұл жүйе өтініш беру мүмкіндігін және өтініш берушінің 24 мемлекеттік органдар мен ұйымдардың базалары арқылы кіру критерийлеріне сәйкестігін автоматты түрде тексеруді көздейді.

Мәселен, ағымдағы жылдың наурыз айынан бастап 69 мыңнан астам өтініш келіп түсті, оның 80% - і бойынша банкроттық рәсімінің критерийлеріне сәйкессіздіктер анықталды. Нәтижесінде 5,7 мың азамат банкрот деп танылды.

 Жалпы, үкімет халықтың кредиттелуін төмендету және «Қарызсыз қоғам» жобасын масштабтау жөнінде нақты шаралар қабылдауда.

• 20.10.2023
• 192