Ақтөбе облысында қызылша жұқтырғандарға арналған орындар 40%-ы – бос

Ақтөбе облыстық денсаулық сақтау басқармасының басшысы Рүстем Исаевтің хабарлауынша, облыс көлемінде қызылша жұқтырған науқастарға арналған орындар жеткілікті.

 «Қазіргі уақытта Ақтөбе облысында қызылша  жұқтырғандарға арналған керуеттердің 40%-ы – бос. Қызылшамен ауыратын 143 емделуші (Ақтөбе қаласы - 113), оның ішінде 119 бала стационарлық ем алуда. Облыс аумағында барлығы 236 жатын орын қарастырылған, оның ішінде Ақтөбеде қызылшаны емдеуге арналған жалғыз стационар - «Шағала» шипажайында 135 орын бар, ал қаланың басқа медициналық мекемелерінде бұл инфекциямен емделіп жатқандар жоқ», - деп атап өтті Рүстем Исаев.

Естеріңізге сала кетейік, Ақтөбе облысының аумағында қызылша жұқтырғандарды тіркеу ағымдағы жылдың ақпан айында басталған-ды. Бүгінгі таңда қызылша инфекциясы деп күдіктенген 1220-дан астам жағдай тіркелді, оның 579-ы (51,6%) зертханалық тұрғыда расталды.

Аурудың 77%-дан астамы қызылшаға қарсы егілмеген балалар арасында тіркелген.

Санитарлық-эпидемиологиялық бақылау департаментінің мәліметінше, балабақшалардағы топтар мен облыс мектептеріндегі сыныптар карантинге жабылмаған.

Өздеріңіз білетіндей, соңғы аптада қызылша ауруының өршуі бүкіл республика көлемінде байқалады. Ресми деректерге сүйенсек, науқастардың көпшілігі Алматы және Жамбыл облыстарында, сондай-ақ Алматы, Шымкент және Астана қалаларында тіркелген.

• 30.10.2023
• 164