Ақтөбе облысында «Ауыл аманаты» жобасын қаржыландыру көлемі 12,5 млрд. теңгеге өсті

Ақтөбе облысында «Ауыл аманаты» жобасын жүзеге асыру белсенді жалғасуда.

Еске салайық, жоба былтыр қараша айында басталған еді. Биылғы жылдың ақпан айына дейін «Ауыл аманатын» қаржыландыруға жалпы алғанда 6,5 млрд теңге бөлінді. Өткен айдың соңында қаржыландыру көлемі тағы 12,5 млрд теңгеге өсті. Қаражат мал шаруашылығын несиелеуге де жіберіледі деп жоспарланып отыр. 

Бұл туралы Өңірлік коммуникациялар қызметінде өткен баспасөз мәслихатында ауыл шаруашылығы және жер қатынастары басқармасының өкілі Бағдат Қожамұрат мәлімдеді.

«Қазіргі таңда жалпы сомасы 7,6 млрд теңгеге 1698 жоба тапсырылып, оның 1628-і мақұлданды. 1 382 жобаға 6,1 млрд. теңге жеңілдетілген несие берілді. Сонымен бірге, жоба аясында қаржылық несиемен қатар тауарлық несие беру тетігі енгізілді. Бүгінгі күні 335 отбасыға 4716 бас мал берілді. Жобаға Алға, Қарғалы, Қобда, Мәртөк, Ойыл және Хромтау аудандары белсене қатысуда»,- деп атап өтті спикер.

Жобаны іске асырудың нәтижесінде бүгінде 173 мыңнан астам құс сатып алынып, 209,8 гектар картоп пен көкөніс және бақша дақылдары егілді, шағын бизнестің 584 жаңа жобасы жүзеге асырылып жатыр. Бұрын тұрақты жұмысы болмаған 1010 адам жұмыспен қамтылды.

Жеке қосалқы шаруашылықтардың жұмысын тиімді ұйымдастырып, оларды техника, жем-шөп және вакциналармен қамтамасыз ету және өндірген өнімін тиімді өткізу мақсатында 71 ауыл шаруашылығы кооперативі құрылды. Алдағы уақытта кооперативтер санын одан әрі ұлғайтып, жобаға қатысушылар ауқымын кеңейту жоспарланып отыр.

• 03.11.2023
• 190