Энергетика министрі алматылықтарға қалалық электр станцияларын жаңғырту барысы туралы айтып берді

Энергетика министрі алматылықтарға қалалық электр станцияларын жаңғырту жұмыстарының барысы туралы айтып берді

Жұма күні ҚР Энергетика министрі Алмасадам Сәтқалиев Алматы халқымен есеп беру кездесуін өткізіп, онда электр стансаларын жаңғырту, отынмен қамтамасыз ету бойынша атқарылып жатқан жұмыстарға тоқталып, тұрғындарды толғандырған сұрақтарға жауап берді.

Қазіргі уақытта қаланың электр және жылу энергиясына қажеттілігін Алматы ЖЭО-1, ЖЭО-2, ЖЭО-3 (электр және жылу энергиясын өндіру), Қапшағай су электр станциясы, Каскад су электр станциясы (электр энергиясын өндіру) қамтамасыз етуде.

Орталықтандырылған жылумен жабдықтауға қалған қажеттіліктер негізінен «Алматытеплокоммунэнерго» ЖШС («АТКЭ» ЖШС) қазандықтарында және басқа да шағын жылу көздерінде өндіріледі.
Электр энергиясының жетіспеушілігі «Алатау Жарық Компаниясы» АҚ электр энергиясын тасымалдау және тарату бойынша үлкен энергетикалық жүйе арқылы жабылады.
Осы үш ЖЭО-ның барлығында да қазіргі уақытта жаңғырту және газға көшіру жұмыстары жүргізілуде.

Атап айтқанда, Алматы ЖЭО-1 ауыстыру жобасы жалпы қуаты 225 МВт дейін бу-газ қондырғыларын орнатумен станцияны кеңейтуді көздейді. Жобаны іске асыру 2025-2028 жылдарға жоспарланған.

Алматы ЖЭО-2-де қуаттылығы 557 МВт-қа дейінгі бу-газ қондырғысы базасында қоршаған ортаға әсерді барынша азайта отырып, станцияны жаңғырту және жаңа станция салу жөніндегі жоба жүзеге асырылуда.
Алматы ЖЭО-3-ті ауыстыру жобасы жалпы қуаты 545 МВт бу-газ қондырғыларын орнатумен станцияны кеңейтуді көздейді.

2026 жылдан бастап ЖЭО-2 және ЖЭО-3-ті газға толық ауыстыру кезең-кезеңімен басталады.
Министрдің айтуынша, 2-ЖЭО және 3-ЖЭО-ны газбен қамтамасыз ету, сондай-ақ Алматының энергетикалық қауіпсіздігін қамтамасыз ету мақсатында «ҚазақГаз» бірнеше жобаны жүзеге асырып жатыр: Қазақстан-Қытай және Алматы-Байсерке-Талғар магистральдық газ құбырлары арасындағы ТИП-04 көпірінің құрылысы;
ЖЭО-2 және ЖЭО-3 үшін АГРС құрылысы.
Бұл жобаларды ағымдағы жылдың соңына дейін аяқтау жоспарлануда.

Сонымен қатар, газ құбырларына арналған жер телімдерін қайтару аяқталғаннан кейін Алматы – Байсерке – Талғар газ құбырының 2-ші желісінің құрылысын бастау жоспарлануда.
Жер телімдерін қайтаруға 11,6 млрд-қа жуық қаражат қажет, оны Үкімет резервінен бөлу жоспарлануда.
Алматыға сапары барысында Энергетика министрлігінің басшысы Алматы ЖЭО-2, «Орбита» ауданы қазандығындағы жылу беру кезеңімен де танысып, азаматтарға жеке қабылдау өткізді.

• 03.11.2023
• 223