ПАВЛОДАР ОБЛЫСЫНЫҢ ТҰРҒЫНДАРЫМЕН КЕЗДЕСУ ӨТКІЗДІМ

Павлодар облысына жұмыс сапарымен барғанымда, Екібастұз қаласында өңір тұрғындарымен бірқатар кездесулер өткіздім. Оқу-ағарту министрлігі тарапынан атқарылып жатқан негізгі міндеттерге тоқталып өтіп, жиын барысында тұрғындардың барлық сұрақтарына жауап бердім. 

Өңірдегі педагогтер қауымдастығымен және ата-аналармен кездесуде білім беру сапасын арттыру, кадрлық әлеуетті күшейту, инфрақұрылымды жақсарту және балалардың қауіпсіздігін қамтамасыз етуге қатысты негізгі бағыттар туралы баяндадым. 

Биылдан бастап Президенттік жастар кадрлық резервінің үлгісінде «Білім берудегі өзгерістердің 1000 көшбасшысы» жобасын жүзеге асырып жатырмыз. Бүгінде іріктеудің бірінші кезеңі аяқталды. Педагогтерді кәсіби тұрғыда дамыту жүйесі түбегейлі өзгереді. Биыл 142 мың педагог біліктілікті арттыру курстарынан өтеді. Бұл ретте негізгі назар ауыл педагогтеріне бағытталған. Олардың үлесі 70% құрайды. Қазіргі уақытта 210 қазақстандық ұстаз «Болашақ» халықаралық бағдарламасы аясында «Педагогика» және «Білім беру» бағыттары бойынша шетелде тағылымдамадан өтуде. 

Сондай-ақ, биыл қыркүйек айында «Біртұтас тәрбие бағдарламасы» қабылданғанын еске салды. Оның мақсаты – жалпыадамзаттық және ұлттық құндылықтар негізінде саналы ұрпақ тәрбиелеу.

Мемлекет педагог мәртебесін көтеру, инфрақұрылымды дамыту, оқушыларға жайлы және қауіпсіз жағдай жасау бағытында барлық міндеттемелерді орындайды. Біздің қазіргі басты міндетіміз - әр баланы сапалы білім және саналы тәрбиемен қамтамасыз ету. Бұл - білім беру жүйесінің әрбір тармағының үйлесімді жұмыс істеуіне тікелей байланысты. 

Тұрғындарды толғандырған барлық сұрақтарға жауап бердім. Көтерілген мәселелер негізінен мектепке дейінгі, орта және кәсіптік білім беру саласына қатысты болды. 

• 07.11.2023
• 158