Нұрлан Ноғаев Бейнеу ауданының жаңа әкімін таныстырды

Бүгін, 7 қарашада өңір басшысы Нұрлан Ноғаев 5 қарашада өткен аудан әкімінің пилоттық сайлауы нәтижесінде халық сайлаған Бейнеу ауданының жаңа әкімі Рахымжан Шалбаевты аудан активіне таныстырды.

Аудандық сайлау төрағасы Дәулет Сауырбаев сайлау қорытындыларын жариялап, жаңа аудан әкіміне тиісті куәлік табыс етті.

Рахымжан Шалбаев Ш. Есенов атындағы Ақтау университетінің шет тілдері кафедрасын бітірген.

Еңбек жолын 1998 жылы Бейнеу ауылының № 2 орта мектебінде ағылшын тілі пәні мұғалімі болып бастаған.

2003 жылдан 2007 жылға дейін бас маман, жастар ісі, мәдениет және спорт бөлімдерінің басшысы, Бейнеу ауданы әкімнің орынбасары қызметтерін атқарды.

2007-2010 жылдары Бейнеу аудандық мәслихатының хатшысы.

2010-2015 жылдары «Нұр Отан» ХДП Ақтау қалалық филиалы төрағасының орынбасары, бірінші орынбасары қызметінде болды.

2015-2018 жылдары қазақша күрес және дзюдо бойынша Маңғыстау облыстық балалар мен жасөспірімдер спорт мектебінің оқу ісі жөніндегі меңгерушісі.

2018 жылдан 2019 жылға дейін жеке секторда жұмыс істеді.

2019-2020 жылдары «Nur Otan» партиясы Маңғыстау облыстық филиалының партиялық бақылау инспекторы.

2020 жылдан бастап қазіргі уақытқа дейін - Бейнеу ауданы әкімінің орынбасары.

Өңір басшысы Рахымжан Шалбаевтың жұмысына сәттілік тілеп, оның сайлаушылардың үмітін ақтайтынына сенім білдірді. Сондай-ақ, Бейнеу ауданының әлеуметтік-экономикалық дамуына қатысты бірқатар нақты тапсырмалар берді.

• 07.11.2023
• 173