Сенатта жаңа Салық кодексінің тәсілдері талқыланды

Сенаттағы Үкімет сағатында Ұлттық экономика министрі Әлібек Қуантыров ҚҚС (қосылған құн салығы) мөлшерлемесін 12%-дан 16%-ға дейін арттыру жөніндегі жоспарлар туралы айтты. Ставканының өсуі бюджетке 2-2,4 трлн. теңге мөлшерінде қосымша түсімдер әкеледі.

Бұл Ұлттық қордан республикалық бюджетке берілетін кепілдендірілген трансферттердің көлемімен бірдей. Қосымша кірістер осы трансферттердің мөлшерін қысқартуға мүмкіндік береді. Тиісінше, Ұлттық қордың жинақтау функциясын күшейтеді. Бұл өте маңызды. Біз Ұлттық қорды болашақ ұрпақ үшін сақтауымыз керек, – деді ҰЭМ басшысы.

Министрдің айтуынша, негізгі экономикалық әріптестермен салыстырғанда ҚҚС төмен мөлшерлемесі осы елдерден Қазақстанға тауарларды экспорттауды тиімді етеді. ҚҚС мөлшерлемесінің өсуі, ең алдымен, импорттық тауарларға жүктемені арттырады. Қазақстанда азық-түлік тауарларын өндіру және қайта өңдеу үшін ҚҚС салудың қолайлы жағдайлары жасалған.

Сондай-ақ, бірқатар сатушылар бөлшек салық режимін қолданады, онда ҚҚС-тан босату қарастырылған. Бұл жеңілдіктер сақталады.

Бұдан басқа, шикізат және қаржы секторлары, сондай-ақ ойын бизнесі салалары үшін КТС (корпоративтік табыс салығы) мөлшерлемесін 25-30%-ға дейін арттыру ұсынылады.

Жалақы бойынша табыстар үшін ЖТС (жеке табыс салғы) мөлшерлемесін жылына 480 ЕТЖ (40 млн. теңге) астам мөлшерде ұлғайту мәселесі қаралуда. «Сән-салтанат» заттарына салық салу, импорттық қымбат алкоголь және темекі өнімдеріне қосымша акциздер енгізу, мүлікке салық салу тәсілдерін қайта қарау, арнайы салық режимдерін оңтайландыру, салық жеңілдіктерінің тиімділігін арттыру мәселелері бойынша жұмыс жүргізілуде.

Министр агроөнеркәсіптік кешен үшін салық режимдері сақталатынын атап өтті. Президент Жолдауын орындау мақсатында өңдеу өнеркәсібіндегі жаңа жобаларға 3 жылға жеңілдіктер берілетін болады.

Сенат депутаттарынан, бизнес-қоғамдастық өкілдерінен мынадай ұсыныстар келіп түсті:

салық заңнамасының тұрақтылығы мен болжамдылығы

геологиялық барлауды ынталандыру

өңдеу өнеркәсібін қолдау, оның ішінде осы салаға бөлшек салық режимін қолдану

металл өнімдерін импорттау кезінде ҚҚС төлеуді кейінге қалдыру

импортқа ҚҚС есепке жатқызу әдісімен төлеу тетігінің қолданылу мерзімін ұзарту

ауыл шаруашылығы тауарын өндірушілер мен жеке қосалқы шаруашылықтар үшін қолданыстағы салық режимдерін сақтау

көлеңкелі экономика үлесінің төмендеуі

Жалпы, барлық ұсыныстар жұмысқа алынды және одан әрі бизнес-қоғамдастықпен және сарапшылармен бірлесіп жаңа Салық кодексін әзірлеу бойынша жұмыс шеңберінде талқыланатын болады.

• 09.11.2023
• 162