Танымал қазақстандық спортшы Ақтөбе облысындағы 4 мектепке сый жасады

Қазақстан мен әлемнің бірнеше дүркін рекордшысы, ҚР Туризм және спорт министрлігінің ресми амбассадоры, Ақтөбе қаласында жыл сайын өтетін «G-STRONG POWER FEST» спорт фестивалінің амбассадоры Сергей Цырульников Ақтөбе облысына келді.
 
 Өңірге іссапары аясында спортшы өз бастамасымен қолға алған «100 ауыл» жобасын таныстырды. Спортшының өз қаражаты және достарының демеушілігімен іске асырылып жатқан бұл жобаға Мемлекет басшысы оң бағасын берді.
 
Бағдарлама ауылдың әлеуетін көтеруге, салауатты өмір салтын сақтауға, өскелең ұрпаққа спортты насихаттауға бағытталған. Оның аясында бюджеттен тыс қаражат есебінен ауыл мектептері спорттық жабдықтармен (доптар, бокс қолғаптары, секіру құрылғылары, теннис ракеткалары және т.б.) қамтамасыз етіледі. Сондай-ақ, шеберлік сағаттарын, тәрбие жұмыстарын өткізу көзделген.  
 
Бірінші күні спортшы Алға ауданының Маржанбұлақ және Бестамақ орта мектептерінде, екінші күні Хромтау ауданының Ақжар және Қарғалы ауданының Петропавловка ауылдарындағы мектептерде болды.  Қара күштің иесі білім ордаларында ауыл жастарымен кездесіп, шеберлік сағатын өткізді, жетістікке жетудің құпияларымен бөлісті. Оқушыларға әкелген сыйлықтарын табыстады. Сонымен қоса, кездесуге келген белсенді оқушыға спортшы шегеден жасалған жүрекшелерді сыйға тартты.

• 15.11.2023
• 184