Нұрлан Ноғаев «Арманда» халықаралық форумының спикерлерімен кездесті

15 қарашада Ақтауда өңір басшысы Нұрлан Ноғаев «Арманда» форумының спикерлерімен кездесті, деп хабарлайды Маңғыстау облысы әкімінің баспасөз қызметі.

Кездесуге Қазақстанның еңбек сіңірген қайраткері, медиа-менеджер, «Арманда» форумының тележүргізушісі және идеялық авторы Арман Дәулетяров, қазақстандық еркін стильдегі балуан, ҚР еңбек сіңірген спорт шебері, Сиднейдегі 2000 жылғы Олимпиаданың күміс жүлдегері Ислам Байрамуков және әйгілі айтыскер ақын, тележүргізуші, «Сөз менеджменті» кітабының авторы Жандарбек Бұлғақов қатысты.

Кездесуде ұйымдастырушы Арман Дәулетяров жобаның негізгі мақсаты туралы айтып берді.

- «Арманда» - бұл қоғам өміріне бей-жай қарамайтын қайраткерлер мен меценаттардың басын біріктіретін білім беру бизнес-форумы. Форумның негізгі міндеті - қазақстандық қоғам үшін ең өзекті тақырыптар бойынша сындарлы пікірталастар алаңын құру болып табылады. Мұнда білім беру, отбасылық құндылықтарды насихаттау, сондай-ақ жастардың рухани және әлеуметтік дамуы мәселелері қаралады, - деп атап өтті медиа-менеджер Арман Дәулетяров.

Нұрлан Ноғаев мұндай форумдар жастарды отбасылық құндылықтарды құрметтеуге, сондай-ақ әрдайым тұлға ретінде және кәсіби дамуға шақырып, қоғамдық пікірді қалыптастыруға елеулі үлес қосатынын атап өтті.

-Мемлекет Басшысы Қасым-Жомарт Тоқаев отбасы институты біздің ұлтымызды қалыптастыруда шешуші рөл атқарады. Себебі отбасы еңбекқорлық, білімге ұмтылу, бірлік сияқты «Адал азамат» қағидатына сәйкес келетін, қасиеттерді әр адамның бойына орнықтыруға жәрдемдесетінін атап өтті. Дана халқымыз: «Отан отбасынан басталады» деп бекер айтпаған, өйткені салт-дәстүрге деген сүйіспеншілік пен құрмет, туған жерге деген патриотизм отбасындағы тәрбиемен беріледі. Осындай құндылықтардың барлығын ата-ана баласына тәрбие мен жеке үлгісі арқылы сіңіреді. Маңғыстау облысы қазақы қаймағы бұзылмаған, салт-дәстүрді бойына терең сіңірген ерекше өңір. Бұл біздің күнделікті өміріміздің әртүрлі аспектілерінде көрінеді. Халқымыздың салт-дәстүрге беріктігі және аймаққа тән ерекше ландшафтымыз өңірді туристер үшін одан әрі тартымды ете түседі, – деп атап өтті облыс әкімі Нұрлан Ноғаев.

Айта кетейік, форум Ақтауда 15 қарашада Достық үйінде өтеді.

• 15.11.2023
• 213