Нұрлан Ноғаев: Маңғыстаудың туристік әлеуетін толыққанды пайдалану маңызды

2023 жылдың алғашқы жарты жылдығында Маңғыстау облысына 180 мыңға жуық турист келген, бұл өңірдегі туристік саланың қарқынды өсуінің айқын дәлелі болып табылады. Олар Қазақстанның әр түкпірінен және басқа елдерден келген туристер. Бұл туралы аймақ басшысы Нұрлан Ноғаев қатысқан аппараттық кеңесте белгілі болды, деп хабарлайды Маңғыстау облысы әкімдігінің баспасөз қызметі.

Маңғыстау облысы туризм басқармасының басшысы Мәулен Ғабдулқалиевтің айтуынша, өңірімізге Ресейден, Ираннан, Жапониядан, сондай-ақ Шығыс Еуропадан келетін туристердің саны артқан. Сонымен қатар, туризм саласындағы қызметтер көлемі өткен жылмен салыстырғанда 1,3 есеге ұлғайып, 4,8 миллиард теңгеге жеткен.

2023 жылы облыста бірнеше ірі туристік іс-шаралар өткен. Олардың қатарында танымал «Орел и Решка» телешоуы мен Беларусьтік Dream and Travel тобының бейнетүсірілімі, белгілі автоблогерлер мен журналистердің қатысуымен өткен автошеру, «Esquir Picnic» республикалық отбасылық фестивалі, Japan fit Silk Roads ЮНЕСКО халықаралық конференциясы және Қазақстанда туризмді дамыту жөніндегі халықаралық форумы бар.

Сондай-ақ, өңірдің туристік тартымдылығын арттыру мақсатында биыл өңірде гидтер мен экскурсоводтарды сертификаттауға бағытталған 10 күндік семинар-тренинг ұйымдастырылды. Семинарда туризм саласындағы әлемдік деңгейдегі сарапшы-мамандар 50-ге жуық гид және экскурсоводтармен тәжірибесімен бөлісті.

Мәулен Ғабдулқалиев туристер санын ұлғайту және туристік әлеуетті дамыту жөніндегі бастамалар мен жобалар жалғасын табатынын атап өтті. Оның айтуынша, 2027 жылға дейін салаға 100 миллиард теңге инвестиция тарта отырып, 700-ден астам жұмыс орнын құру, сондай-ақ 13 жобаны іске асыру жоспарлануда.

Өңір басшысы Нұрлан Ноғаев Маңғыстаудың туристік әлеуеті зор екенін және оның мүмкіндіктерін толыққанды пайдалану керек екенін атап өтті.

- Мемлекет басшысы Қасым-Жомарт Тоқаев «Туризмді дамыту мәселесіне баса назар аударуға тиіс. Еліміздегі туризмнің әлеуеті зор, көрікті жерлеріміз өте көп. Бұл салаға тың серпін беру үшін, ең алдымен, инфрақұрылым мәселесін кешенді түрде шешіп, қызмет сапасын түбегейлі жақсарту қажет»,- деген болатын. Осы бағыттағы белсенді жүргізіліп жатқан шараларға қарамастан, жұмысты одан әрі жандандыру қажет. Маңғыстау аспан астындығы мұражай, мұнда көптеген қасиетті орындар мен киелі жерлер бар және осы бағыттарда көптеген турлар жұмыстар ұйымдастырылады. Дегенмен, осындай көрікті жерлерімізде біз вандализм және қоқыс тастау оқиғаларын жиі көріп отырмыз. Осындай жағдайлардың алдын-алу үшін, біз қоршаған ортамызды аялап, өзіміздің артымыздан тазалап кетуіміз маңызды. Біздің аймаққа туристердің қызығушылығы жыл санап артып келеді. Сондықтан киелі жерлерімізге ұқыпты қарап, туристермен қарым-қатынас мәдениетін қалыптастыру маңызды, - деп атап өтті Нұрлан Ноғаев.

• 17.11.2023
• 188